باغ : وفاقی وزیر داخلہ رانا ثنااللہ نے کہا ہے کہ مسلم لیگ ن نے ہمیشہ ملک کو بحرانوں سے نکالا، لیکن بابا رحمتے نے سازش کرکے نوازشریف کو نااہل کیا۔
باغ آزاد کشمیر میں تقریب سے خطاب کرتے ہوئے انہوں نے سابق حکومت پر کڑی تنقید کی اور ن لیگ کی حکومت میں کیے جانے والے اقدامات کا ذکر کیا۔
انہوں نے کہا کہ جب بھی پاکستان مشکلات کا شکار ہوا تو ایک ہی جماعت ہے ن لیگ اور اس کا قائد نواز شریف جس نے ملک کو بحرانوں سے نکالا۔
رانا ثنااللہ نے کہا کہ2013سے2017پاکستان اور آزاد کشمیر میں لوڈشیڈنگ ختم ہوئی، پاکستان اور آزاد کشمیر میں دہشت گردی کا بھی خاتمہ ہوا، ان4سال میں پاکستان کی شرح نمو6.2فیصد پر پہنچ گئی تھی۔
ان کا کہنا تھا کہ یہ بات پوری دنیا جانتی ہے کہ پاکستان میں نہ صرف دہشت گردی ختم ہوئی بلکہ دہشت گردی کا بھی قلعہ قمع کیا گیا۔ لیکن اس کے بعد بابا رحمتے نے نواز شریف کے خلاف عدالتی سازش کی اور میاں نواز شریف کو نااہل کیا۔
وہ بابا رحمت جو بعد میں بابا زحمت ثابت ہوا اب چھپتا پھررہا ہے، وہ اگر کسی شادی میں جائے تو کوئی اس سے ہاتھ ملانے کو تیار نہیں ہوتا۔
سابق وزیر اعظم کا ذکر کرتے ہوئے انہوں نے کہا کہ 2014میں اس فتنے نے اسلام آباد پرچڑھائی کی126دن کا دھرنا دیا، سول نافرمانی کی، بل جلائے اور کہا کہ بل بھرنا بند کردیں، کیا اس شخص نے پی ٹی وی اور پارلیمنٹ ہاؤس پر چڑھائی نہیں کی؟
وزیرداخلہ نے کہا کہ سال2018میں اس کے تمام گناہوں پر پردہ ڈالا گیا، اس اشتہاری کو ایک سازش کے تحت الیکٹ کرایا گیا، پاکستانی عوام کا مینڈیٹ چوری کرکے آرٹی ایس بٹھا کر مسلط کردیا گیا۔
نو مئی کے حوالے سے انہوں نے کہا کہ 75سالوں میں کسی سیاسی جماعت نے دفاعی تنصیبات اور جی ایچ کیو پرحملہ نہیں کیا، وہ اب یہ لائن کراس کرچکے جہاں پر بغاوت کی گئی اب اس کی کوئی معافی نہیں۔
انہوں نے مزید کہا کہ اس فتنے کو مسلط کرکے اس بات کو آگے بڑھانے کی کوشش کی گئی کہ یہ اپنے پروجیکٹ کو آگے لے کر چلے، پاکستان میں جتنے میٹرو، موٹر ویز، اسپتال اور جتنی بھی ترقی ہوئی، اگر ان منصوبوں کو جن کے اوپر نواز شریف کا نام لکھا ہوا ہے، ان کو اگر ایک سائیڈ پر کردیں تو باقی حساب لگا لیں کہ پچھلے 70 سالوں میں کیا ہوا، اور اس کے پونے چار سال میں کیا ہوا۔
