کراچی : سابق گورنر سندھ عمران اسماعیل اور رہنما تحریک انصاف علی زیدی نے بلاول بھٹو کی پریس کانفرنس پر اپنے شدید ردعمل کا اظہار کیا ہے۔
بلاول بھٹو کی پریس کانفرنس کے جواب میں عمران اسماعیل نے کہا کہ بحیثیت وزیر خارجہ بلاول بھٹو ڈھٹائی کی اعلیٰ مثال ہیں، آج بیان دیتے وقت بلاول کی ٹانگتی کانپیں عوام نے دیکھ لیں۔
عمران اسماعیل کا کہنا تھا کہ امریکی صدر جوبائیڈن کا بیان موجودہ خارجہ پالیسی کی ناکامی کا منہ بولتا ثبوت ہے، وزیرخارجہ اپنے سخت مؤقف کی بجائے بیان کے فضائل بتارہے ہیں۔
سابق گورنر سندھ نے کہا کہ بلاول زرداری یا حکومت میں ہمت نہیں کہ وہ جوبائیڈن کو جواب دے سکیں، وزیرخارجہ اپنی طرح عوام کو بھی امپورٹڈ سمجھ رہے ہیں۔
انہوں نے کہا کہ جوبائیڈن اس قوم کو شہباز اور بلاول کی طرح بکاؤ مال سمجھنے کی غلطی نہ کریں، پاکستانی قوم اپنے مادر وطن کی حفاظت کرنا جانتی ہے۔
دوسری جانب علی زیدی نے اپنے ردعمل میں کہا کہ شہبازشریف کے وزیرخارجہ کے سوال کاجواب دینا لازمی ہے، امریکہ کے گزشتہ الیکشن کے موقع پر میں یہ سمجھ رہا تھا شاید یہ پاکستانیوں کو اچھا سمجھتے ہوں گے مگر ایسا نہیں۔
انہوں نے کہا کہ امریکی صدر جوبائیڈن کی تقریر کا اسکرپٹ ان کی ویب سائٹ پرموجود ہے، جوبائیڈن کے مطابق دنیا کے خطرناک ترین ملکوں میں پاکستان کا شمار ہوتا ہے۔
علی زیدی کا کہنا تھا کہ عمران خان نے اپنےبیان میں کہا کہ پاکستان کے ایٹمی اثاثے مکمل محفوظ ہیں، ہمارے پاس ایسا ڈرامہ نہ کبھی ہوا نہ ہوگا۔
رہنما تحریک انصاف نے کہا کہ جوبائیڈن ابھی بھی 2002کے دورمیں جی رہے ہیں، امریکی صدر جوبائیڈن کے بیان کی پرزور مذمت کرتا ہوں، عمران خان کے دور میں پاکستان کورونا کے باوجود ترقی کررہا تھا۔
