قاہرہ : جان بچانے کی کوشش میں ڈاکٹروں کی چھوٹی غلطی جان لیوا بن گئی، سرجری کے دوران سابق وزیر انتقال کرگئے۔
غیرملکی خبر رساں ادارے کی رپورٹ کے مطابق مصر کے سابق وزیر صحت ڈاکٹر احمد عماد الدین راضی عارضہ قلب کے باعث سرجری کے دوران ڈاکٹروں کی غلطی کے باعث خالق حقیقی سے جاملے۔
العربیہ ڈاٹ نیٹ کو ایک ذریعے نے بتایا کہ 68 سالہ سابق وزیر کو اچانک دل کا دورہ پڑا، جس کے بعد انہیں فوری طورپر مشرقی قاہرہ میں واقع نصر شہر کے ایک نجی ہسپتال میں داخل کرایا گیا۔
ڈاکٹروں نے فوری طور پر وزیر صحت کی سرجری کا فیصلہ کیا تاہم سرجری کے دوران طبی غلطی سے ان کی جان ہی چلی گئی۔
ڈاکٹر احمد عماد الدین کا شمار مصر کے مشہور آرتھوپیڈک سرجنوں میں کیا جاتا ہے۔ اپنے کیریئر کے دوران ڈاکٹر راضی متعدد کلیدی عہدوں پر فائز رہے جن میں عین الشمس یونیورسٹی کے فیکلٹی آف میڈیسن کے ڈپٹی ڈین کی ذمہ داری بھی شامل ہے۔
