ٹوکیو: جاپان کے سابق وزیر اعظم شنزو ایبے پر انتخابی جلسے میں قاتلانہ حملہ ہو گیا ہے۔
تفصیلات کے مطابق شنزو ایبے جمعہ کے روز نارا شہر میں صبح ساڑھے گیارہ بجے ایوان بالا کے انتخابات سے قبل ایک تقریب میں تقریر کر رہے تھے جب اچانک انھیں ایک شخص نے گولی مار دی، جس سے شدید زخمی ہو گئے ہیں۔
جاپانی میڈیا کے مطابق حملہ آور کو موقع ہی پر گرفتار کر لیا گیا ہے، حملہ آور سے تفتیش کی جا رہی ہے، جب کہ زخمی شنزو ایبے کو فوری طور پر اسپتال منتقل کیا گیا۔
قاتلانہ حملے کے بعد 67 سالہ سابق عالمی رہنما کی حالت تشویش ناک ہے، شنزو ایبے کو گولی لگنے کے بعد دل کا دورہ بھی پڑا، انھیں سی پی آر دیا جا رہا ہے۔
رپورٹس کے مطابق مشتبہ حملہ آور چالیس سال کی عمر کا ہے، ایک خاتون عینی شاہد نے بتایا کہ شنزو ایبے تقریر کر رہے تھے کہ اسی اثنا میں پیچھے سے ایک شخص آیا اور گولی چلا دی، پہلی گولی کی آواز ایسی تھی جیسے کھلونے کی ہو، سابق صدر اس سے نہیں گرے۔
خاتون نے جاپانی سرکاری میڈیا کو بتایا کہ اس کے بعد دوسری گولی کی آواز آئی جو بہت تیز تھی اور شعلہ اور دھواں اٹھتا بھی نظر آیا، سابق صدر گر گئے اور لوگ اکھٹے ہو کر انھیں اٹھانے کی کوشش کرنے لگے۔
