The news is by your side.

Advertisement

دن میں نیند بھگانے کے لیے کیا کیا جائے؟

بعض لوگ نیند کے انتہائی رسیا ہوتے ہیں اور دن میں بھی سونا چاہتے ہیں لیکن اس سے کام ڈسٹرب ہوسکتا ہے۔

دراصل دن میں نیند آنے کی کئی وجوہات ہوسکتی ہیں، آج ہم آپ کو انہی وجوہات اور ان پر قابو پانے کے طریقے بتا رہے ہیں۔

رات میں نیند پوری کریں

دن کے وقت ضرورت سے زیادہ نیند آنے کی سب بڑی اور اہم وجہ رات میں 8 گھنٹے کی پرسکون نیند نہ لینا ہے۔

نیند پوری نہ ہونے کی وجہ سے جسم اگلے دن اسے پوری کرنے کے لیے مواقع تلاش کرے گا، اسی لیے کوشش کریں کہ رات میں مناسب نیند لیں تاکہ دن کے وقت اس کیفیت سے دور رہا جاسکے۔

چند منٹ کا قیلولہ کریں

جب آپ جسم اور دماغ کو دوبارہ متحرک کرنے کے لیے مختصر وقت کا قیلولہ یا نیپ لیتے ہیں تو یہ کافی مددگار ثابت ہوتا ہے۔

یہ نیپ ایسے وقت میں لیا جاتا ہے جب جسم کو تھکن کی صورت میں فوری آرام کی ضرورت ہو، یہ صرف 10 سے 20 منٹ تک لیا جاتا ہے اور اس قدر مختصر ہونے کے باوجود یہ آپ کو تروتازہ اور توانا کردیتا ہے۔

کیفین سے بھرپور مشروبات

کیفین سے بھرپور مشروبات جیسے چائے، کافی اور سافٹ ڈرنکس نیند کو دور کرنے اور چاک و چوبند رکھنے میں اہم کردار ادا کرتے ہیں لہٰذا ایسے مشروب کا انتخاب کریں جس کے مضر صحت اثرات کم ہوں۔

علاوہ ازیں پانی کی کمی بھی نہ ہونے دیں۔

کام کے دوران وقفہ لیں

ایک ہی طرح کا کام کرنے سے اکتاہٹ ہونے لگتی ہے جس کے نتیجے میں آنکھیں بوجھل سی ہونے لگتی ہیں، جب کبھی ایسا ہو تو معمول کے کام سے چند منٹ کا وقفہ لیں، یہ آپ کی نیند کو دور کرنے میں مدد فراہم کرسکتا ہے۔

صحت بخش اور توانائی سے بھرپور غذا لیں

ناشتہ کرنے سے دن کے وقت ضرورت سے زیادہ نیند آنے سے نمٹنے میں مدد مل سکتی ہے۔

اس بات کو یقینی بنائیں کہ ناشتہ ہلکا پھلکا لیکن صحت بخش اور توانائی سے بھر غذاؤں پر مشتمل ہو، کیونکہ بھاری ناشتہ آپ کی غنودگی میں اضافے کا سبب بنے گا۔

ورزش کریں

ورزش کے نتیجے میں خون کی گردش بہتر ہوتی ہے اور اس طرح دماغ میں آکسیجن کی سپلائی بڑھ جاتی ہے، جب بھی آپ کو دن میں نیند آنے لگے تو کوشش کریں کسی جسمانی سرگرمی کو انجام دیں، اس طرح دن میں سستی اور نیند آنے سے بہتر انداز میں نمٹا جاسکتا ہے۔

Comments

یہ بھی پڑھیں