روس اور یوکرین کے درمیان جنگی قیدیوں اور لاشوں کا تبادلہ کیا گیا ہےا ور روس نے یوکرین کو 909 فوجیوں کی لاشیں بھیج دی ہیں۔
غیر ملکی خبر رساں ایجنسی کے مطابق روس اور یوکرین کے درمیان تقریباً ساڑھے تین سال سے جاری جنگ کے دوران فریقین کے درمیان ایک بار پھر جنگی قیدیوں اور لاشوں کو تبادلہ کیا گیا ہے اور روس نے یوکرین کو 909 فوجیوں کی لاشیں پہنچا دی ہیں۔
رپورٹ کے مطابق یوکرین نے روس کی جانب سے 909 فوجیوں کی لاشیں موصول ہونے کی تصدیق کر دی ہے۔
دوسری جانب یوکرین نے بھی روس کو 43 فوجیوں کی لاشیں حوالے کی ہیں۔
فروری کے وسط میں یوکرینی صدر نے 46 ہزار فوجیوں کی ہلاکت کی تصدیق کی تھی۔ زیلنسکی کے مطابق روس کے ساتھ جنگ میں تین لاکھ 80 ہزار فوجی زخمی ہو چکے ہیں۔
دوسری جانب غیر ملکی خبر رساں ایجنسی کا یہ بھی کہنا ہے کہ روس نے 2022 میں اپنے 6 ہزار فوجیوں کی ہلاکت کی تصدیق کی تھی، اس کے بعد سے اب تک اپنے نقصانقات کی اطلاع نہیں دی ہے۔
برطانوی نشریاتی ادارے بی بی سی نے جنگ کے آغاز سے اب تک ایک لاکھ روسی فوجیوںکی ہلاکت کا دعویٰ کیا ہے۔
واضح رہے کہ رواں سال مارچ میں یو اے ای کی ثالثی میں روس اور یوکرین میں تین سو جنگی قیدیوں کا تبادلہ ہوا تھا۔ اس سے قبل 2024 میں بھی فریقین جنگی قیدیوں کا تبادلہ کر چکے ہیں۔
