پنجاب پولیس کی بہادر خاتوں افسر نے اچھرہ واقعے کے دوران عوامی غیض و غضب سے خاتون کو کس طرح بچایا تفصیلات سامنے آگئیں۔
لاہور پولیس کی ایس پی شہر بانو نے اے آر وائی نیوز سے خصوص گفتگو کرتے ہوئے بتایا کہ اچھرہ کے واقعے کی اطلاع ون فائیو پر موصول ہوئی، مشتعل ہجوم سے خاتون کو باحفاظت نکالنا مشکل مرحلہ تھا۔
بہادر خاتون پولیس افسر کا کہنا تھا کہ میرے ساتھ موجود اہلکاروں نے ہمت دکھائی اور مشتعل لوگوں کو قابو کرنے کی کوشش کی۔
انھوں نے بتایا کہ کال آئی کہ ایک خاتون نے نازیبا لباس پہنا ہوا ہے اور لوگوں نے انھیں گھیر لیا ہے، ہمارے لیے سب سے بڑا مسئلہ خاتون کی سیفٹی تھی۔
شہر بانو کا کہنا تھا کہ ہم لوگ جب دوکان میں موجود خاتون کو نکالنے گئے تو پیچھے سے لوگ بھی آنے لگے اور گاڑی کو مارنا شروع کردیا جبکہ وہ لوگ گاڑی کے اوپر چڑھ گئے۔
خاتون پولیس افسر نے کہا کہ جو لوگ اس لباس کے خلاف کارروائی کرنا چاہتے تھے جب انھیں اور خاتون کو آمنے سامنے بٹھایا گیا تو یہ بات سامنے آئی کہ خاتون کے لباس میں ایسی کوئی بات ہی نہیں ہے۔
ایس پی نے بتایا کہ خاتون کا کہنا تھا کہ ان کی ایسی کوئی نیت نہیں تھی جیسا کہ لوگوں کو لگ رہی ہے۔ بعد ازاں ہم نے دنوں فریقوں سے تحریر لی کہ انھوں نے اس مسئلے کو حل کرلیا ہے۔
