کراچی: آج کل کے لاک ڈاؤن میں تقریباً ہر شخص اپنا زیادہ تر وقت ٹی وی اور لیپ ٹاپ کے آگے گزار رہا ہے ایسے میں فٹنس کو برقرار رکھنا مشکل ہوگیا ہے، فٹنس ایکسپرٹ رمیز احمد نے فٹنس برقرار رکھنے کے کچھ طریقے بتائے ہیں۔
تفصیلات کے مطابق فٹنس ایکسپرٹ رمیز احمد نے اے آر وائی نیوز کے مارننگ شو باخبر سویرا میں شرکت کی اور ورزشوں اور کھانوں کے حوالے سے بات کی۔
انہوں نے زیادہ فوکس اس بات پر کیا کہ آج کل کے لاک ڈاؤن میں جب بیرونی سرگرمیاں تقریباً ختم ہوچکی ہیں اور تمام وقت گھر پر گزر رہا ہے ایسے میں اپنے آپ کو فٹ کیسے رکھا جائے۔
ماہرین کے مطابق آج کل کے دنوں میں ایک شیڈول بنانے اور اس پر سختی سے عمل کرنے کی اشد ضرورت ہے اور اس شیڈول میں ورزش کا اہم حصہ ہونا چاہیئے۔
رمیز نے بھی گھر میں رہتے ہوئے کچھ مخصوص ورزشیں کرنے کے طریقے بتائے جو نیچے ویڈیو میں دیکھے جاسکتے ہیں۔ ان ورزشوں سے جسم کو فعال اور فٹ رکھا جاسکتا ہے۔
انہوں نے کہا کہ میں نے دیکھا ہے کہ آج کل لوگ قسم قسم کے کھانے پکا اور کھا رہے ہیں جس سے ان کا وزن بڑھ رہا ہے۔ ان کے مطابق اپنی غذا گڈ کاربس، پروٹین اور گڈ فیٹس پر مشتمل بنائیں۔
اس حوالے سے رمیز نے بتایا کہ اچھے کاربس میں سفید ابلے ہوئے چاول، براؤن بریڈ اور خشک میوہ جات شامل ہیں جبکہ پروٹین والی غذائیں مچھلی، چکن اور مٹن ہیں۔
انہوں نے ورزش کے حوالے سے ایک غلط فہمی یہ بھی دور کی کہ بڑھا ہوا پیٹ صرف ورزش سے کم نہیں ہوتا بلکہ اس کے لیے ڈائٹ بھی ضروری ہے۔
علاوہ ازیں مسلز بنانے کی ورزش بھی پیٹ کم کرسکتی ہے کیونکہ مسلز کی ورزش سے پہلے پیٹ اندر کی طرف جانا شروع ہوتا ہے اس کے بعد شیپ میں آتا ہے۔ بعد ازاں مختلف پوسچرز سے اس کو مزید بہتر کیا جاتا ہے۔
