اسلام آباد: ترجمان مذہبی امور نے مہنگے حج اخراجات سے متعلق تمام خبروں کی تردید کردی۔
اے آر وائی نیوز کے مطابق ترجمان مذہبی امور نے مہنگے حج اخراجات سے متعلق خبروں کی تردید کرتے ہوئے کہا ہے کہ حج پالیسی سےمتعلق خبروں میں کوئی صداقت نہیں ہے۔
ترجمان مذہبی امور کے مطابق حج پالیسی 2020 ابھی تک کابینہ میں پیش نہیں ہوئی، مناسب اخراجات اور بہترین سہولیات کی حامل حج پالیسی تشکیل دی جائے گی۔
واضح رہے کہ سینیٹ کی قائمہ کمیٹی برائے مذہبی امور کے اجلاس میں سیکریٹری وزارت مذہبی امور نے بتایا تھا کہ رواں سال حج کے سرکاری اخراجات میں ایک لاکھ 15 ہزار روپے اضافہ کیا جائے گا۔
مزید پڑھیں: حج اخراجات معاشی حالات کے مطابق قوم کے سامنے رکھے گئے: وزیر مذہبی امور
سیکریٹری وزارت مذہبی امور نے کمیٹی کو بتایا کہ رواں سال ایک لاکھ 79 ہزار عازمین حج کی سعادت حاصل کریں گے جبکہ حج پیکیج میں ایک لاکھ 15 ہزار کا اضافہ کیا گیا ہے۔
نارتھ ریجن کا حج پیکیج 5 لاکھ 50 ہزار جبکہ ساؤتھ ریجن کا حج پیکیج 5 لاکھ 45 ہزار روپے ہوگا، حج اخراجات میں اضافہ روپے کی قدر میں کمی اور ایئرلائنز کے کرایوں میں اضافے کی وجہ سے کیا گیا ہے۔
