کراچی: پوائنٹ آف سیل پر عمل درآمد نہ کرنے پر مہنگی ترین گھڑیوں کے 3 آؤٹ لیٹ سیل کر دیے گئے۔
تفصیلات کے مطابق ایف بی آر کے لارج ٹیکس آفس نے ٹیکس چوری کے خلاف کارروائی کرتے ہوئے پوائنٹ آف سیل پر عمل درآمد نہ کرنے والے مہنگی گھڑیوں کے تین آؤٹ لیٹ سیل کر دیے۔
ایل ٹی او ٹیم نے مہنگی ترین گھڑیوں کے آؤٹ لیٹ کے ریکارڈ بھی قبضے میں لیے، ایف بی آر کا کہنا ہے کہ ٹیکس دہندگان نے مہنگی ترین گھڑیوں کا اسٹاک 4 کروڑ روپے بتایا تھا لیکن ریکارڈ کے مطابق فروخت کی گئی گھڑیوں کی قیمت 70 کروڑ روپے بنتی ہے۔
ایف بی آر کے مطابق مہنگی ترین گھڑیوں پر سیلز ٹیکس 25 فی صد عائد ہے، اس لیے 70 کروڑ روپے کی فروخت پر 25 فی صد سیلز ٹیکس 18 کروڑ روپے بنتا ہے۔
ایف بی آر نے آئی ایم ایف کی ایک اور شرط پوری کر دی
واضح رہے کہ رواں ماہ ایف بی آر نے آئی ایم ایف کی شرط پوری کرتے ہوئے پاکستان میں صنعتی شعبے کی پیداوار کو مانیٹر کرنے کا فیصلہ کیا ہے، ایف بی آر کے مطابق اشیا کی پیداوار کی الیکٹرانک ویڈیو نگرانی کی جائے گی، ویڈیو نگرانی کے لیے ڈیجیٹل آئی سافٹ ویئر نصب کیا جائے گا، سینٹرل کنٹرول یونٹ ایف بی آر کو رئیل ٹائم ڈیٹا فراہم کرے گا، جس کے بعد پیداواری ریکارڈ کا تجزیہ کر کے قانونی کارروائی کی جا سکے گی۔
