بلوچستان میں چمن کے علاقے گلستان میں ایک مارکیٹ میں دھماکا ہوا ہے جس کے نتیجے میں 4 افراد شہید اور 8 زخمی ہوئے ہیں۔
اے آر وائی نیوز چمن کے نمائندے اختر گلفام کے مطابق گلستان کے علاقے میں فوڈ پوائنٹ کے قریب دھماکا ہوا۔ یہ ریموٹ کنٹرول دھماکا تھا اور دھماکا خیز مواد موٹر سائیکل میں چھپایا گیا تھا۔
دھماکے کی اطلاع ملتے ہی پولیس اور دیگر سیکیورٹی وتحقیقاتی ادارے اور ریسکیو ادارے جائے حادثہ پر پہنچ گئے اور امدادی سرگرمیاں شروع کر دیں۔
پولیس کے مطابق دھماکے کے نتیجے میں 4 شہری شہید اور 8 زخمی ہوئے ہیں۔ لاشوں اور زخمیوں کو کوئٹہ اسپتال منتقل کیا گیا۔
دوسری جانب سیکیورٹی اور تحقیقاتی اداروں نے علاقہ کو گھیرے میں لے کر شواہد جمع کرنا شروع کر دیے ہیں۔
