نئی دہلی: حج کمیٹی آف انڈیا کی جانب سے حج درخواست فارم جمع کرانے کی تاریخ میں توسیع کردی گئی ہے۔
غیر ملکی ذرائع ابلاغ کے مطابق حج کمیٹی آف انڈیا نے حج سے وابستہ سرکاری و غیر سرکاری تنظیموں، ریاستی حج کمیٹیوں، پاسپورٹ آفس کی تعطیلات، بعض ریاستوں / علاقوں میں شدید بارش کے سبب نظام زندگی کا متاثر ہونا اور خود عازمینِ حج کے شدید مطالبے پر تاریخ میں توسیع کی ہے۔
وزارتِ اقلیتی امور حکومتِ ہند میں ڈائریکٹر اور حج کمیٹی آف انڈیا کے سی،ای،او ڈاکٹر لیاقت علی آفاقی آئی۔ آر۔ ایس کا کہنا تھا کہ حج کمیٹی آف انڈیا کے تحت حج پر جانے کے خواہشمند عازمین اب 23 ستمبر 2024 تک حج کمیٹی آف انڈیا کی ویب سائٹ یا موبائل پر ”حج سوویدھا ایپ”کے ذریعے آن لائن درخواست جمع کراسکتے ہیں۔
بھارت میں حج کمیٹی آف انڈیا کے سی، ای، او ڈاکٹر لیاقت علی کی جانب سے درخواست دہندگان کو ہدایتی مشورہ دیا گیا کہ حج فارم درخواست بھرنے سے پہلے گائیڈ لائنز حج 2025 اور حلف نامہ کا پوری توجہ سے مطالعہ کرلیں۔
انہوں نے خواہشمند عازمین سے گزارش کی ہے کہ توسیع شُدہ تاریخ تک حج درخواست فارم لازمی جمع کرادیں۔ اب تاریخ میں توسیع تقریباً نا ممکن ہے۔
انہوں نے عازمین سے اپیل کی حج 2025 کے لیے بنائے گئے نظام الاوقات پر عمل کریں۔ تاکہ ویزے کی حصولیابی، رہائش، ہوائی ٹکٹ و دیگر انتظامات وقت پر صحیح سے مکمل ہوسکیں۔
ڈاکٹر آفاقی نے بتایا اب تک تقریباً,1,15,000 (ایک لاکھ پندرہ ہزار) عازمین حج 2025 کے لیے رجسٹریشن مکمل ہوچکی ہے، جس میں مہاراشٹرا گجرات، کیرالا، اترپردیش اور کرناٹک سے بالترتیب سب سے زیادہ عازمین حج کے لیے رجسٹریشن کرا چکے ہیں۔
انہو ں نے مزید کہا کہ عازمین کسی بھی معلومات اور دشواری کے حل کے لیے صرف حج کمیٹی آف انڈیا کی ویب سائٹ اور ریاستی حج کمیٹیوں کے دفاتر سے رابطہ کریں یا حج کمیٹی آف انڈیا کے ہیلپ لائن نمبر 22107070 -022 سے معلومات حاصل کی جاسکتی ہیں۔
