لندن: برطانیہ کی کاؤنٹی ویلز کے فارم میں عجیب الخلقت بچھڑے کی پیدائش ہوئی جس کی تصاویر سوشل میڈیا پر وائرل ہوگئیں۔
غیرملکی خبررساں ادارے کی رپورٹ کے مطابق برطانیہ کی کاؤنٹی ویلز کے ایک فارم میں جانوروں کی ڈاکٹر مالن ہیوز معائنہ کی غرض سے گئیں تو انہوں نے تین آنکھوں والا بچھڑا دیکھا جس کی تصاویر انہوں نے اپنے ٹویٹر اکاؤنٹ سے شیئر کردیں۔
تصاویر میں دیکھا جاسکتا ہے کہ بچھڑے کی ایک آنکھ اس ماتھے پر موجود ہے۔
رپورٹ کے مطابق بچھڑے کی عمر 4 ماہ ہے اور وہ صحت مند ہے، تاحال یہ واضح نہیں ہوسکا ہے بچھڑا تیسری آنکھ سے دیکھ سکتا ہے یا نہیں۔
ڈاکٹر مالن ہیوز کے مطابق بحیثیت ڈاکٹر اس قسم کا جانور انہوں نے اپنی زندگی میں پہلی مرتبہ دیکھا ہے۔
انہوں نے کہا کہ بظاہر اس کی یہ آنکھ بالکل ٹھیک لگتی ہے لیکن اس کی آنکھ میں سے کسی قسم کا مواد خارج ہورہا ہے اس لیے یہ جاننا ناممکن ہے کہ دراصل اس کی آنکھ کے اندر کیا ہورہا ہے۔
واضح رہے کہ گزشتہ سال فروری میں بھارت کے گاؤں پاراسالائی میں عجیب الخلقت گائے کے بچے کی پیدائش ہوئی تھی جس کے دو سر، چار آنکھیں، دو منہ اور دو کان تھے۔
گائے کے بچے کو دیکھنے کے لیے دور دراز کے شہروں سے لوگ آ رہے تھے، کسان بھشکر کا کہنا تھا کہ زمینداری کے ساتھ مویشی پالنے کا کام اُن کا جدی پشتی ہے مگر وہ پہلی بار اس طرح کی گائے دیکھ رہے ہیں۔
اُن کا کہنا تھا کہ ہمیں ایسے بچھڑے کی توقع نہیں تھی، پیدائش پر مجھ سمیت سارے گھر والے بچھڑے کو دیکھ کر حیران رہ گئے۔
