سان فرانسسکو: سماجی رابطے کی سب سے بڑی ویب سائٹ فیس بک نے سفید فام قوم پرست تنظیم سے تعلق رکھنے والے کئی صارفین کے اکاؤنٹس بلاک کردیے۔
غیرملکی خبررساں ادارے کی رپورٹ کے مطابق بلاک شدہ اکاؤنٹس کے ذریعے نسل پرستی کے خلاف تحریک کو بدنام کرنے کی منصوبہ بندی کی جارہی تھی جس کے تحت ایکشن لیا گیا۔
رپورٹ میں کہا گیا ہے کہ جن فیس بک اکاؤنٹس کو بلاک کیا گیا ان کا تعلق سفید فام قوم پرست سے تھا جو سیاہ فاموں کو بدنام کرنے اور حالیہ نسل پرستی کی تحریک کو دہشت گردی کی شکل دینے کی کوشش کررہے تھے۔
بلاک کیے جانے والے اکاؤنٹس کے روابط سفید فام گروپ ’پراؤڈ بوائز‘ سے بھی رہے ہیں اور فیس بک انتظامیہ پہلے ہی مذکورہ گروپ کو خطرناک قرار دے چکی ہے۔
فیس بک کے ایک عہدیدار کا کہنا ہے کہ یہ ایکشن سیاسی بنیاد پر نہیں بلکہ ملک کو انتشار سے بچانے کے لیے لیا گیا۔ کمپنی نے پہلے سے ہی مذکورہ بلاک شدہ اکاؤنٹس کو نظر میں رکھا ہوا تھا۔
