خوبصورت نظر آنا خواتین کا حق اور خواہش ہوتی ہے اور وہ اس کے لیے لاکھوں جتن بھی کرتی دکھائی دیتی ہیں، اس مقصد کے لئے خواتین مہنگی سے مہنگی کریمیں اور لوشن استعمال کرتی ہیں۔
لیکن اہم بات یہ ہے کہ خواتین کی خوبصورتی کا تمام تر انحصار صحت مند جلد پر ہے اگر اسکن صحت مند ہوگی تو آپ خود بخود دلکش اور خوبصورت نظر آئیں گی۔
اس حوالے سے اے آر وائی ڈیجیٹل کے پروگرام گڈ مارننگ پاکستان میں شوبز کی نامور اداکارہ بشریٰ انصاری، شرمین علی اور مریم نور نے اپنے اپنے خیالات کا اظہار کیا۔
بشریٰ انصاری کا کہنا تھا کہ میری مرحومہ بہن سنبل کی جلد بہت آئیلی تھی جس کی وجہ سے اس کے چہرے پر دانے نکل آتے تھے اس لیے وہ بہت پریشان رہتی تھی۔
مریم نور نے کہا کہ جہاں تک چہرے پر دانے نکلنے کی بات ہے وہ تو لازمی نکلیں گے اس کیلئے ضروری ہے کہ ذہنی طور پر تیار رہا جائے اور اس کا بروقت علاج کریں یہ سارے مسائل زندگی کے ساتھ ہیں۔
اداکارہ شرمین علی نے بتایا کہ ہمارے گھر میں فروٹ اور سبزیوں کو زیادہ اہمیت دی جاتی ہے کوئی بھی کھانا بغیر سلاد کے نہیں بنتا تھا، میری امی بھی ڈائٹنگ کا بہت خیال رکھتی تھیں۔ مجھے 16 سال کی عمر تک کسی بھی قسم کا میک اپ کرنے کی اجازت نہیں تھی۔
انہوں نے کہا کہ میری امی روزانہ ایک انڈا لازمی کھلاتی تھیں اس کے ساتھ دودھ اور دہی کا استعمال بھی باقاعدگی سے کیا جاتا تھا، شرمین علی نے بتایا کہ جب میں نے کالج میں داخلہ لیا تو تب سن بلاک کا استعمال شروع کیا اس کے علاوہ شادی ہونے تک میک اپ کی کوئی چیز بھی استعمال نہیں کی۔
