اسلام آباد: سابق وفاقی وزیر و سینیٹر فیصل واوڈا کا کہنا ہے کہ میں پی ٹی آئی حصہ تھا اور نہ ہی اب جانا ہے، میں عمران خان کے ساتھ تھا، وہ آدھی رات کو بھی بلائیں گے تو جاؤں گا۔
پارلیمنٹ ہاؤس کے باہر میڈیا سے گفتگو میں فیصل واوڈا نے کہا کہ عمران خان کو کوئی ڈیل آفر نہیں ہوئی، تاریخ لکھ لیں نہ دھرنا ہوگا اور نہ احتجاج ہوگا یہ سب ٹو پی ڈرامہ ہے۔
فیصل واوڈا نے کہا کہ یہ پرانی تنخواہ پر کام کریں گے، یہ ٹرمپ کارڈ سے اب پلے کارڈ پر آگئے ہیں، عید کے بعد بکرا عید بھی آ جائے گی لیکن کچھ نہیں ہوگا، بجٹ کے دوران کچھ ہلکی گرما گرمی نظر آئے گی۔
انہوں نے کہا کہ آرمی چیف جنرل عاصم منیر نے روشنی کی کرن دکھائی، پاکستان پہلے سیاست بعد میں ہے، ان کے احتساب کے عمل کو دیکھتے ہوئے بیڑہ اٹھایا کہ پاکستان پہلے ہے۔
ان کا کہنا تھا کہدعا گو ہوں کہ وزیر صاحب اپنی وزارت چلا سکیں، جو چیزیں میں لے کر آیا تھا نیب اور وزارت کو وہ جمع کرنے میں 5 سال لگتے، پاکستان کیلیے کام کرتے رہیں گے، بہتر پرفارمنس ہی تو ہے کہ 60 ارب واپس کروائے، میرا ٹارگٹ 1500 ارب واپس کروانے کا ہے۔
فیصل واوڈا نے کہا کہ پاکستان پیپلز پارٹی کے ساتھ میرے پرانے تعلقات ہیں، آصف علی زرداری صاحب ہمارے بڑے ہیں۔
وزیر اعظم ریلیف پیکج پر فیصل واوڈا نے کہا کہ وزیر اعظم کے 5 ہزار میں سے صرف چولہا ہی جل سکتا ہے وہ بھی بغیر گیس کے۔
