اسلام آباد: سابق سینیٹر فیصل واوڈا نے دعویٰ کیا ہے کہ چھے سے سات دن میں حکومت سازی کا معاملہ طے ہو جائے گا۔
اے آر وائی نیوز کے پروگرام ’آف دی ریکارڈ‘ میں گفتگو کرتے ہوئے فیصل واوڈا نے کہا کہ سب کو جمہوری مزہ لینا تھا سب کو مزہ لینے کا شوق تھا، آئین اور قانون کے تحت جمہوریت اور ایکسپائرڈ لیڈروں کا مزہ لے لیا، قوم نے آپ کو بتا دیا آپ کدھر کھڑے ہیں آپ کی اوقات کیا ہے۔
فیصل واوڈا نے کہا کہ سیاسی اور جمہوری طور پر ڈیڈ ہیں اور حالات کی وجہ سے لاک بھی ہیں، حکومت بنائیں گے مزے بھی لیں گے اور اقتدار کو نوچیں گے۔
اپنی گفتگو میں انہوں نے یہ بھی دعویٰ کیا کہ اس بار چیئرمین سینیٹ ایک بڑے عہدے سے ہی آئیں گے جو نیوٹرل ہوں گے، نیا آنے والا بڑے عہدے سے اتر کر چیئرمین سینیٹ بنے گا۔
سابق سینیٹر نے کہا کہ وزیر اعلیٰ بلوچستان کیلیے صورتحال دلچسپ ہے 2 لوگ دوڑ میں ہیں، سرفراز بگٹی اور ایک اور دوست دوڑ میں کبھی کبھی پیچھے ہو جاتے ہیں، آج کی تاریخ میں وزیر اعلیٰ کیلیے ثنا اللہ زہری کا ایک قدم آگے ہے۔
انہوں نے کہا کہ پیپلز پارٹی ملک کے وسیع تر مفاد اور جمہوریت کیلیے ہر وقت حاضر ہوتی ہے، اس کو یہ بھی نہیں پتا تھا شہد کی طرح بھر کر آئے گی مکھیاں چپک جائیں گی، کنگر میکر جہاں آزاد ہیں وہاں پیپلز پارٹی بھی ہے، (ن) لیگ پنجاب کی ایم کیو ایم 2 بن گئی ہے اور اس کا آخری اقتدار ہے۔
ان کا کہنا تھا کہ اگر پیپلز پارٹی وزارتوں میں آگئی تو 2 سال جمہوریت کے مزے لے لیں، اس بار مزہ ایسا یاد رہے گا کہ ساری زندگی اس کے ٹھیکیدار بھی یاد رکھیں گے، ایسا مزہ ہوگا کہ آئین و جمہوریت کے ٹھیکیدار ساری عمر یاد رکھیں گے۔
فیصل واوڈا نے کہا کہ پہلے دن سے کہتا آیا ہوں آج پھر کہہ رہا ہوں نتیجہ تباہی نکلے گا۔
