The news is by your side.

پی ٹی آئی نے فیصل واوڈا کی پارٹی رکنیت معطل کردی

کراچی : پاکستان تحریک انصاف نے پی ٹی آئی رہنما فیصل واوڈا کی پارٹی رکنیت معطل کردی، اظہار وجوہ کا نوٹس جاری کردیا گیا۔

تفصیلات کے مطابق پی ٹی آئی سندھ کے صدر علی زیدی نے فیصل واوڈا کو پارٹی پالیسی کی خلاف ورزی پر شوکاز نوٹس جاری کرتے ہوئے ان کی پارٹی رکنیت معطل کردی۔

اپنے ایک بیان میں علی زیدی نے کہا کہ فیصل واوڈا کو اظہار وجوہ کا نوٹس جاری کردیا گیا اور ان کو دو روز میں اپنی حالیہ پریس کانفرنس کے حوالے سے جواب جمع کرانے کی ہدایت دی گئی ہے۔

اظہار وجوہ نوٹس کے متن میں لکھا گیا ہے کہ آپ کی پارٹی رکنیت کیوں نہ منسوخ کردی جائے، اس بات جواب 2دن میں دیں۔

قبل ازیں تحریک انصاف سندھ کے صدر علی زیدی نے فیصل واوڈا کی پریس کانفرنس پر ردعمل دیتے ہوئے کہا کہ یہ واضح ہے کہ امپورٹڈ حکومت نے ان کو لانچ کیا ہے۔

ٹوئٹر پر جاری بیان میں علی زیدی نے کہا کہ فیصل واوڈا نے ہمارے لانگ مارچ کو نقصان پہنچانے کی کوشش کی دلچسپ بات یہ ہے کہ پی ٹی وی سمیت تمام چینلز نے بھی پریس کانفرنس دکھائی۔

واضح رہے کہ پاکستان تحریک انصاف کے رہنما فیصل واوڈا اپنی پریس کانفرنس میں انکشاف کیا تھا کہ ارشد شریف کے قتل کی سازش پاکستان میں ہوئی، آنے والے چند دنوں میں نام دے دوں گا۔

انہوں نے کہا کہ صحافی ارشد شریف کے ساتھ کھڑا ہوں اور کھڑا رہوں گا ان کا قتل کوئی حادثہ نہیں ہے ان کا موبائل فون، لیپ ٹاپ اور کوئی شواہد نہیں ملیں گے کیونکہ شواہد مٹا دیے گئے ہیں۔

Comments

یہ بھی پڑھیں