کراچی: وفاقی وزیر آبی وسائل فیصل واوڈا نے کہا ہے کہ آبی شعبے کی بہتری، ڈیموں کی تعمیر کے لیے موثراقدامات کیے جا رہے ہیں، ورلڈ بینک کے تعاون سے ہائیڈرو پاور اور آبی شعبہ مزید ترقی کرے گا۔
تفصیلات کے مطابق ورلڈ بینک کے صدر نے وفاقی وزیرفیصل واوڈا کے ہمراہ تربیلا ڈیم کا دورہ کیا، تربیلا ڈیم، ہائیڈل پاور اسٹیشن اور ہائیڈرو پاورکے توسیعی منصوبے کا جائزہ لیا۔
اس موقع پر سیکرٹری آبی وسائل، چیئرمین واپڈا سمیت ورلڈ بینک کے حکام بھی موجود تھے، عالمی بینک نے پانی کے شعبے میں بہتری کے لیے فیصل واوڈا کی کوششوں کو سراہا ہے، وفد نے داسو ہائیڈرو پاور پراجیکٹ کی تکمیل میں مسائل حل کرنے پر بھی اطمینان کا اظہار کیا۔
فیصل واوڈا نے کہا ہے کہ آبی شعبے کی بہتری، ڈیموں کی تعمیر کے لیے موثراقدامات کیے جا رہے ہیں، ورلڈ بینک کے تعاون سے ہائیڈرو پاور اور آبی شعبہ مزید ترقی کرے گا۔
وفاقی وزیر آبی وسائل نے کہا کہ تربیلا ڈیم سے ایم اے پی 378 پانی زرعی ضروریات پوری کرتا ہے، تربیلا سے بجلی کے 523 بلین یونٹس نیشنل گرڈ میں شامل ہوتے ہیں۔
وفاقی وزیر آبی وسائل فیصل واوڈا نے ڈیموں سے متعلق منصوبوں میں تعاون پر ورلڈ بینک کے صدر کا شکریہ ادا کیا۔
