اسلام آباد: سینیٹر فیصل واوڈا نے کہا ہے کہ گزشتہ رات کہا تھا بانی پی ٹی آئی کی بہنوں کی رہائی کیلئے کوشش کروں گا۔
تفصیلات کے مطابق بانی پی ٹی آئی عمران خان کی بہن علیمہ اور عظمیٰ خان کی رہائی کے بعد سینیٹر فیصل واوڈا نے ٹوئٹ میں کہا کہ گزشتہ رات کہا تھا بانی پی ٹی آئی کی بہنوں کی رہائی کیلئے کوشش کروں گا اور آج الحمدللہ بانی پی ٹی آئی کی بہنوں کی ضمانت ہوچکی ہے۔
فیصل واوڈا کا کہنا تھا کہ بکاؤ پی ٹی آئی لیڈر شپ ان کی بہنوں کو ایک بار بھی پوچھنے جیل نہیں گئی، بکاؤ پی ٹی آئی لیڈر شپ اپنے لیڈر کی بہنوں کو جیل میں ایک بار بھی پوچھنے نہیں گئی۔
انہوں نے کہا کہ قوم کو ان کی اصلیت سمجھ نہیں آ رہی کہ کیا گیم ہو رہی ہے؟ لیکن میں قوم کو سچ بتاتا رہوں گا اور یہ لیڈر شپ آپ سے چھپاتی رہے گی، میرا یہ دعویٰ اور وعدہ بھی پورا ہوا۔
علیمہ خان اور عظمی خان کی ضمانتیں منظور
واضح رہے کہ انسدادِ دہشتگردی عدالت اسلام آباد نے بانی پی ٹی آئی کی بہن علیمہ خان، عظمیٰ خان کے خلاف ڈی چوک احتجاج کیس میں ضمانت کی درخواستیں منظور کرتے ہوئے رہا کرنے کا حکم دیدیا۔
انسدادِ دہشتگردی عدالت اسلام آباد نے 20، 20 ہزار روپے کے مچلکوں کے عوض عمران خان کی دونوں بہنوں کی ضمانتیں منظور کی ہیں۔
