فیصل آباد : انٹرنیٹ کے ذریعے سادہ لوح عوام کو لوٹنے والے گروہ کے چار ملزمان کو ایف آئی اے نے گرفتار کرلیا۔
تفصیلات کے مطابق ایف آئی اے نے فیصل آباد کے علاقے ملت چوک میں کارروائی کر کے انٹرنیٹ کے ذریعے لوگوں کو لوٹنے والے گروہ کے چار ارکان گرفتار کر لئے۔
ملزمان کے قبضے سے تین سو سے زائد موبائل فون کی سمیں اور لیپ ٹاپ برآمد کرلئے ۔ ملزمان کے بائیس بینک اکاؤنٹس میں اٹھارہ لاکھ روپے موجود ہونے کا انکشاف بھی ہوا ہے۔
ایف آئی اے کی ٹیم نے منگل کی رات ملت چوک میں کارروائی کر کے تین سگے بھائیوں سمیت چار ملزمان اعظم ، عباد علی ، سعد علی اوراسفرعلی کو گرفتار کرلیا۔
ان کے قبضے سے 280 نان ایکٹو سمیں ، 51 ایکٹو سمیں، نو لیپ ٹاپ اور کمپیوٹرز، پندرہ موبائل فونز اور دستاویزات برآمد کر لیں۔ جبکہ تین ملزمان لیاقت ، نثار اور وسیم موقع سے فرار ہو گئے ۔
ملزمان کے خلاف پانچ مختلف دفعات کے تحت مقدمہ درج کر لیا گیا ہے۔ ایف آئی اے ذرائع کے مطابق ملزمان انٹرنیٹ کے ذریعے شہریوں کو دولت کمانے کا جھانسہ دے کر اب تک لاکھوں روپے بٹور چکے ہیں ۔
ملزمان کے بائیس بینک اکاؤنٹس کا سراغ مل گیا ہے جن میں اٹھارہ لاکھ روپے کی رقم موجود ہونے کا انکشاف ہوا ہے۔