فیصل آباد : عوام نے پی ٹی آئی کے منحرف رہنما راجہ ریاض کے خلاف پوسٹرز اور بینرز آویزاں کرکے احتجاج کیا جبکہ راجہ ریاض کے تصویری پوسٹر جلا ڈالے۔
تفصیلات کے مطابق فیصل آباد میں پی ٹی آئی کے منحرف رہنما راجہ ریاض کے خلاف ان کے حلقے کےعوام نے پوسٹرز لگا دئیے، پوسٹرز پر ’ووٹ فروش‘ اور ’تم کتنی پارٹیاں بدلوگے‘ کے نعرے تحریر ہیں۔
ڈسٹرکٹ بار فیصل آباد کے اطراف میں بھی پوسٹرز اور بینرز آویزاں کیے گئے، جن میں ’پی ٹی آئی کے ووٹوں سے جیتنے والے استعفیٰ دو‘ کے مطالبات درج ہیں۔
اس سے قبل ضلع کونسل چوک پر مظاہرین نے راجہ ریاض کی تصاویر اور پوسٹروں کو نذر آتش کیا اور راجہ ریاض کے خلاف نعرے بھی لگائے۔
گذشتہ روز سندھ ہاؤس میں چھپے پی ٹی آئی کے ارکان قومی اسمبلی منظرعام پر آئے تھے اور راجا ریاض، نواب شیرو سیر، نور عالم خان، باسط بخاری سمیت 27 ارکان کی جانب سے سندھ ہاؤس میں پناہ لی۔
راجہ ریاض کا کہنا تھا کہ سیاست میں سب جائزہے، پی ٹی آئی کےٹکٹ پرلوگوں کاسامنانہیں کرسکتے، ابھی اتنا ٹائم نہیں، عدم اعتمادمیں ووٹ ڈال کر استعفی دیں گے، اسپیکرکی ہمیں کوئی ضرورت نہیں،اس سے جو ہوتا ہے کرلے۔
منحرف رہنما نے مزید کہا تھا کہ ہمیں نا اہل کیا توتیار ہیں، الیکشن لڑ کر واپس آئیں گے ، الیکشن آنے پر مسلم لیگ نون سے ٹکٹ لوں گا، میرا عمران خان، جہانگیر ترین سے ڈھائی سال سے اختلاف تھا، میں صحیح وقت کا انتظار کررہاتھا۔
