فیصل آباد : تاندلیانوالہ میں ایک ہاؤسنگ سوسائٹی پر قبضے کیخلاف ہونیوالے مظاہرے میں مقامی رکن اسمبلی کے بھائی نے مظاہرین پرگولیاں چلادیں، فائرنگ سے ایک بچے سمیت آٹھ افراد زخمی ہوگئے.۔
تفصیلات کے مطابق تاندلیاں والا کے بازار میں سر عام گولیاں چل گئیں، با اثر افراد کی مبینہ بھتہ خوری کے خلاف احتجاج کرنے والے تاجر زد میں آگئے۔
فیصل آباد کی تحصیل تاندلیانوالہ میں تاجر شٹر ڈاؤن ہڑتال کر کے انجمن سبزی منڈی کے صدر پر تشدد اور مقامی لیگی ایم پی اے کے خلاف احتجاجی مظاہرہ کر رہے تھے۔
لیگی کارکنوں نے زبر دستی دکانیں کھلوانے کی کوشش کی تو جھگڑا ہوگیا۔ بندوق تھامے لیگی کارکن نے اسٹریٹ فائر کھول دیئے فائرنگ سے صحافی اور دو بچوں سمیت آٹھ افراد زخمی ہوگئے زخمیوں کو طبی امداد کیلیے اسپتال منتقل کردیا گیا۔ جہاں دو زخمیوں کی حالت تشویشناک بتائی جاتی ہے۔
دوسری جانب میڈیا سے گفتگو کرتے ہوئے تاجروں نے الزام عائد کیا ہے کہ ایم پی اے کا بھائی تاجروں سے بھتہ مانگتا ہے اسے بھتہ نہ دیا جائے تو تشدد کیا جاتا ہے۔
بااثر افراد کی فائرنگ اور ساتھیوں کے زخمی ہونے پر تاجروں نے ٹائر جلاکر فیصل آباد اوکاڑہ روڈ بھی بلاک کردیا۔
