فیصل آباد: پنجاب کے شہر فیصل آباد میں گھر میں سوئی خاتون پر چھری سے حملہ کیا گیا جس کے نتیجے میں وہ شدید زخمی ہوگئیں۔
تفصیلات کے مطابق فیصل آباد کے علاقے اعجاز ٹاؤن میں گھر میں سوئی ہوئی خاتون چھری سے حملے کے نتیجے میں زخمی ہوگئیں، خاتون کو تشویش ناک حالت میں الائیڈ اسپتال منتقل کردیا گیا۔
پولیس کے مطابق متاثرہ خاتون کے شوہر فیصل نے 2 شادیاں کررکھی ہیں، تھانہ غلام محمد آباد میں بھائی شہباز کی مدعیت میں مقدمہ درج کرلیا گیا ہے۔
خاتون کے بھائی شہباز کا کہنا ہے کہ بہن پر شوہر فیصل نے قاتلانہ حملہ کیا ہے وہ پہلے بھی تشدد کرتا رہا ہے، فیصل نے جرم پر پردہ ڈالنے کے لیے ڈکیتی مزاحمت کا ڈرامہ رچایا ہے۔
مزید پڑھیں: فیصل آباد : سفاک شوہر نے بیوی کی زبان کاٹ دی، ملزم گرفتار، مقدمہ درج
ادھر فیصل آباد گورنمنٹ اسکول کے پرنسپل علی رضا کو سرٹیفکیٹ نہ دینے پر 6 افراد نے تشدد کا نشانہ بنایا ہے۔
پولیس کا کہنا ہے کہ ملزمان سرٹیفکیٹ لینے آئے تھے پرنسپل کی جانب سے پیر کو آنے کا کہنے پر دھمکیاں دیں، اسکول کے باہر کھڑے ملزمان نے پستول کے دستے اور مکے بھی مارے۔
نمائندہ اے آر وائی نیوز کے مطابق تھانہ ساہیاں والا میں درخواست جمع کرادی تاہم مقدمہ درج نہیں ہوسکا ہے، زخمی پرنسپل علی رضا ہیڈ ماسٹرز ایسوسی ایشن کے صدر بھی ہیں۔
