بلاوئیو : پاکستان اور زمبابوے کے درمیان کھیلے جانے والے چوتھے ایک روزہ میچ میں قومی ٹیم کے اوپننگ بلے باز فخر زمان اور امام الحق پہلی وکٹ پر 304 رنز بناکر طویل ترین شراکت کا نیا عالمی ریکارڈ بنالیا ہے، فخر زمان نے سعید انور کا ریکارڈ بھی توڑ دیا۔
تفصیلات کے مطابق بلاوائیو میں پاکستان اور زمبابوے کے درمیان کھیلے جانے والے پانچ ون ڈے میچز کی سیریز کے چوتھے میچ میں پاکستان کے اوپننگ بلے بازوں فخر زمان اور امام الحق نے بہترین کھیل پیش کرتے ہوئے 304 رنز بنائے۔
پاکستان نے کل 399 رنز بنا کر اپنا سب سے بڑا ٹوٹل بھی کرلیا یعنی قومی ٹیم نے فخرزمان کی مدد سے ایک میچ میں ہی تین ریکارڈ قائم کرلیے ہیں۔
فخرزمان نے 210 رنز بنا کربھارت کے خلاف سعید انور کے 194 رنز کا طویل ترین ریکارڈ توڑ دیا ہے، فخر زمان ڈبل سنچری کرنے والے پاکستان کے پہلے اور دنیا کے چھٹے کھلاڑی ہیں، جبکہ ون ڈے کرکٹ کی یہ ساتویں ڈبل سنچری ہے۔ فخر زمان نے 148 گیندوں پر ڈبل سنچری5 چھکوں اور 24 چوکوں کی مدد سےمکمل کی ۔
دوسری جانب امام الحق نے 113 رنز بنائے جبکہ آصف علی 50 رنز بنا کر ناٹ آؤٹ رہے۔
History!
Congratulations @FakharZamanLive on your record breaking innings. the first Pakistani ODI Double Centurion 👏. pic.twitter.com/VvkAlBkB0I— PCB Official (@TheRealPCB) July 20, 2018
دوسری جانب پاکستان کی اوپننگ بیٹنگ لائن نے 304 رنز بناکر پہلی وکٹ پر سب سے بڑی شراکت کا نیا عالمی ریکارڈ بھی قائم کردیا ہے۔
کرکٹ کی دنیا میں 286 رنز کی طویل ترین شراکت کا عالمی ریکارڈ اس سے قبل سری لنکا کے پاس تھا، جسے لنکن بیٹس مین جے سوریا اور تھرنگا نے انگلینڈ کے خلاف شاندار کھیل پیش کرتے ہوئے لیڈز کے گراؤنڈ میں یکم جولائی سنہ 2016 کو بنایا تھا۔
ساتھ ہی ساتھ پاکستان نے ون ڈے کرکٹ میں اپنا سب سے بڑا ٹوٹل بھی اسی میچ میں اسکور کیا ہے ۔ اس سے قبل پاکستان کا سب سے بڑا ٹوٹل بنگلہ دیش کے خلاف 385 رنز کا تھا۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں
