The news is by your side.

Advertisement

سعودی عرب: کرونا وائرس کا ’علاج‘ کرنے والا جعلی ڈاکٹر گرفتار

ریاض: سعودی عرب میں حکام نے کرونا کے علاج کا دعویٰ کرنے والے جعلی ڈاکٹر کو گرفتار کرلیا، مذکورہ شخص غیر ملکی تھا جس نے ایک رہائشی کمپاؤنڈ میں کمرے کو کلینک میں تبدیل کیا تھا۔

سعودی ویب سائٹ کے مطابق سعودی عرب کےعلاقے وادی الدواسر کمشنری میں جرائم کا سراغ لگانے والے ادارے نے کرونا وائرس کے جعلی معالج کو گرفتار کرلیا ہے۔

وزارت داخلہ کے اہلکار نے بتایا کہ سراغرساں ادارے کو رپورٹ ملی تھی کہ اقامہ و محنت قوانین کی خلاف ورزی کرنے والا ایک غیر ملکی کارکن وادی الدواسر میں کرونا کا معالج بنا ہوا ہے۔

مذکورہ شخص نے ایک رہائشی کمپاؤنڈ میں کمرے کو کلینک میں تبدیل کیا ہے جہاں اس کے 5 معاون اس کے ہم وطنوں کو یہ جھانسہ دے کر لا رہے ہیں کہ وہ کرونا وائرس کا معالج ہے۔

اطلاع ملتے ہی وادی الدواسر پولیس کے ڈائریکٹر کرنل فہد العتیبی نے ایک کمیٹی تشکیل دے کر جعلی معالج کو رنگے ہاتھوں گرفتار کرنے کی مہم سونپی۔

وزارت داخلہ کے عہدیدار نے بتایا کہ منصوبے کے مطابق غیر ملکی کارکن کے کلینک پر چھاپہ مارا گیا۔

چھاپے کے دوران کلینک سے مختلف قسم کی دواؤں کا اسٹاک برآمد ہوا، پوچھ گچھ سے پتہ چلا کہ دوائیں نامعلوم ذرائع سے حاصل کی گئی تھیں جبکہ بھاری رقم بھی برآمد ہوئی۔

سیکیورٹی اہلکاروں نے جعلی غیر ملکی معالج اور اس کے 5 معاونین کو رنگے ہاتھوں گرفتار کر کے قانونی کارروائی کے لیے متعلقہ اداروں کی تحویل میں دے دیا۔

Comments

یہ بھی پڑھیں