بھارت کی ریاست بہار میں یوٹیوب ویڈیو دیکھ کر آپریشن کرنے والے جعلی ڈاکٹر نے 15 سالہ لڑکے کی جان لے لی اور موقع سے فرار ہوگیا۔
میڈیا رپورٹس کے مطابق لڑکے کی شناخت کرشنا کمار کے نام سے ہوئی جس کے والد چندن شا نے بتایا کہ بار بار الٹی کرنے پر اسے گنپتی اسپتال منتقل کیا تھا جہاں اس کی طبیعت سنبھل گئی تھی لیکن ڈاکٹر اجیت کمار پوری نے آپریشن کا کہا، ملزم نے یوٹیوب پر ویڈیوز دیکھ کر سرجری کی جس سے میرا بیٹا مر گیا۔
چندن شا کے مطابق وہ نہیں جانتے کہ ڈاکٹر اہل ہے یا نہیں لیکن بعد میں معلوم ہوا کہ وہ جلعی معالج تھا۔
نوجوان کے دادا نے بتایا کہ الٹیاں بند ہونے کے بعد پوتا بہتر محسوس کر رہا تھا لیکن ڈاکٹر نے گھر والوں کی رضامندی کے بغیر اس کا آپریشن شروع کر دیا۔
انہوں نے بتایا کہ کرشنا کمار بہت تکلیف میں تھا، جب ہم نے ڈاکٹر سے پوچھا کہ اس کو اتنی تکلیف کیوں ہو رہی ہے تو وہ پر غصہ ہونے لگا کہ ڈاکٹر میں ہوں یا آپ؟
دادا کے مطابق جعلی ڈاکٹر نے غلط آپریشن کے بعد پوتے کو کسی اور اسپتال منتقل کرنے کا کہا لیکن وہ راستے میں ہی دم توڑ گیا، ہم صرف یہ چاہتے تھے کہ کرشنا کمار کی الٹیاں بند ہو جائیں لیکن ملزم نے ہماری مرضی کے خلاف آپریشن کیا۔
پولیس نے ایف آئی آر درج کر کے لاش کو پوسٹ مارٹم کیلیے بھیج دیا جبکہ جعلی ڈاکٹر اور دیگر ملوث عملے کا سراغ لگانے کی کوشش کی جا رہی ہے۔
