کراچی: اِن لینڈ ریونیو نے قومی خزانے کو اربوں روپے کا نقصان پہنچانے والی جعلی/فلائنگ انوائس مافیا کے خلاف کریک ڈاؤن شروع کر دیا ہے۔
تفصیلات کے مطابق ایف بی آر اِن لینڈ اینڈ انویسٹی گیشن نے جعلی رسیدوں کے اسکینڈل کے ماسٹر مائنڈ حسن علی بادامی کے خلاف خصوصی جج کسٹم اینڈ ٹیکسیشن کی عدالت میں درخواست دائر کر کے، اس کے بیرون ملک جانے پر پابندی کی اجازت حاصل کر لی۔
درخواست میں ملزم کا پاسپورٹ منسلک کرنے کا مطالبہ کیا گیا تھا، اور کہا گیا تھا کہ جعلی انوائسز بنانے والی مافیا کی وجہ سے قومی خزانے کو ٹیکس کی مد میں اربوں روپے کا نقصان ہو رہا ہے۔
ان لینڈ ریونیو نے جعلی انوائسز کیس کے مرکزی ملزم حسن علی بادامی پر بیرون ملک جانے کی پابندی کی عدالت سے اجازت حاصل کر لی، حسن علی بادامی کو جعلی انوائس کیس میں مرکزی ملزم نامزد کیا گیا تھا۔
ایف بی آر کے مطابق ملزم حسن علی بادامی نے ہائی کورٹ سے حفاظتی ضمانت، اور ٹرائل کورٹ سے عبوری ضمانت قبل از گرفتاری حاصل کی تھی، ضمانت کے بعد ملزم نے تحقیات میں تعاون کیا، نہ ہی تحقیقاتی ٹیم کے سامنے پیش ہوا۔
ایف بی آر انویسٹی گیشن کا کہنا ہے کہ عدالت نے ملزم کو تحقیقاتی ٹیم کے سامنے پیش ہونے کی بھی ہدایت کی ہے، ٹرائل کورٹ نے ڈائریکٹر ایف آئی اے پاسپورٹ سیل کو نوٹس جاری کر کے ملزم کے پاسپورٹ کو ضبط کرنے کے احکامات جاری کیے، عدالت نے ملزم کو نوٹس جاری کر کے تحقیقات میں مکمل تعاون کرنے کی بھی ہدایت کی ہے۔
ایف بی آر کے مطابق عدالت نے ملزم کو عدالت سے پیشگی اجازت کے بغیر ملک چھوڑنے سے منع کر دیا ہے۔ واضح رہے کہ جعلی/فلائنگ انوائس مافیا نے قومی خزانے کو اربوں روپے کا نقصان پہنچایا ہے۔
