کراچی: شہر قائد میں جعلی تھانیدار گروہ کی ٹول پلازہ آفس پر ڈکیتی کی فوٹیج سامنے آ گئی ہے۔
تفصیلات کے مطابق پولیس حکام کے مطابق تھانیدار گروہ کے 9 کارندوں نے چند روز قبل لنک روڈ کے ٹول آفس سے رقم لوٹی اور فرار ہو گئے تھے، ملزمان نے ٹول آفس پر ٹریلر ڈرائیور کو بھی لوٹا، اور مزاحمت پر شہری کو بٹ بھی مارا تھا۔
فوٹیج میں 4 موٹر سائیکلوں پر آنے والے 9 ملزمان کے پاس اسلحہ بھی دیکھا جا سکتا ہے، پولیس حکام کے مطابق جعلی تھانیدار گروہ کے کارندے کئی مقامات پر پولیس وردی پہن کر وارداتیں کر چکے ہیں۔
واضح رہے کہ گزشتہ روز ایسٹ، تھانہ سائٹ سپر ہائی وے پولیس نے ایک کارروائی میں لنک روڈ ٹول پلازہ پر وارداتیں کرنے والے جعلی تھانیدار گروہ کے اہم ساتھی نور الدین ولد جلال خان کو گرفتار کر لیا تھا۔
چوری کی موٹر سائیکل لے آؤ بدلے میں منشیات لے جاؤ، کراچی میں نیا دھندہ بے نقاب
ملزم اپنے ساتھیوں (جعلی تھانیدار) کے ہمراہ لنک روڈ ٹول پلازہ اور اطراف کے علاقوں میں لوٹ مار کیا کرتا تھا۔ پولیس نے تکنیکی بنیادوں اور سی سی ٹی وی فوٹیج کی مدد سے کارروائی کر کے ملزم نور الدین کو گرفتار کیا۔ پولیس حکام کا کہنا ہے کہ مفرور کارندوں کی گرفتاری کی کوششیں کی جا رہی ہیں۔
