کراچی : شہر قائد میں جعلی پولیس وردی میں ملبوس ڈکیتیاں مارنے والا گروہ ایک بار پھر سرگرم ہوگیا، پولیس نے کامیاب کارروائی کرکے ایک ملزم کو پکڑ لیا۔
اے آر وائی نیوز کی رپورٹ کے مطابق کراچی کے علاقے سائٹ سپر ہائی وے پولیس نے جعلی پولیس وردی میں ملبوس ڈکیتیاں کرنے والے تھانیدار اور اہلکاروں پر مشتمل گروہ کے اہم کارندے کو گرفتار کرلیا۔
پولیس حکام کے مطابق ملزمان جعلی پولیس وردی پہن کر ٹول پلازہ پر وارداتیں کیا کرتے تھے، تھانیدار گروہ کے کارندوں نے چند روز قبل لنک روڈ کے ٹول آفس سے رقم لوٹی اور فرار ہوگئے تھے۔
پولیس حکام کا کہنا ہے کہ 9 رکنی گروہ کے کارندے کو واردات کی سی سی ٹی وی فوٹیج کی مدد سے گرفتار کیا گیا ہے۔
ملزم نور الدین اور اس کے ساتھی پولیس کی مختلف وردیاں پہن کر سائٹ کے علاقے میں وارداتیں کیا کرتے تھے، پولیس حکام کا کہنا ہے کہ گروہ کے مزید مفرور کارندوں کی گرفتاری کی کوششیں کی جارہی ہیں۔
مزید پڑھیں : تھانہ اسٹیل ٹاؤن لنک روڈ پر پولیس وردی پہنے ملزمان لاکھوں لوٹ کر فرار
یاد رہے کہ مذکورہ واردات نیشنل ہائی وے لنک روڈ پر واقع ٹول پر ماہ رمضان میں سحری کے وقت انجام دی گئی تھی، جس کا مقدمہ اسٹیل ٹاؤن تھانے میں درج کیا گیا تھا۔
تھانہ اسٹیل ٹاؤن کی حدود میں لنک روڈ پر موجود کانٹا عملے نے بتایا کہ آٹھ ملزمان نے کانٹے کے عملے کو یرغمال بنا کر واردات کی، ملزمان 10 لاکھ روپے، موبائل فون اور دیگر سامان چھین کر فرار ہوگئے، پولیس کا کہنا ہے کہ ملزمان 4 موٹر سائیکلوں پرسوار تھے۔
