کراچی: بشکیک کے میڈیکل انسٹیٹیوٹ کے جعلی ایڈمیشن لیٹر اور جعلی ویزا پر ملک سے باہر جانے کی کوشش کرنے والے ایک مسافر کو کراچی ایئرپورٹ پر گرفتار کر لیا گیا۔
تفصیلات کے مطابق ایف آئی اے امیگریشن نے کراچی ایئرپورٹ پر ایک مسافر کی جعلی سفری دستاویزات پر بیرون ملک جانے کی کوشش ناکام بنا دی، ملزم کی شناخت سید زین الحسن کے نام سے ہوئی ہے۔
ملزم نوشہرہ ورکاں ضلع گوجرانوالہ کا رہائشی ہے، جس نے جعلی ویزا اور دیگر جعلی دستاویزات پر کرغزستان جانے کی کوشش کی، مسافر کے پاس موجود دستاویزات کی جانچ پڑتال کے دوران جعلی ہونے کا انکشاف ہوا۔
ترجمان ایف آئی اے کے مطابق ابتدائی تفتیش میں معلوم ہوا کہ سید زین الحسن کے پاس بشکیک انٹرنیشنل میڈیکل انسٹیٹیوٹ کا جعلی ایڈمیشن لیٹر تھا، حالاں کہ ملزم کی تعلیمی قابلیت میٹرک سے کم ہے اور اس نے 2018 میں اسکول چھوڑ دیا تھا۔
ملزم کے پاس موجود اسٹڈی ویزا اور ورک ویزا دونوں مشکوک پائے گئے، زین الحسن کے مطابق اس نے جعلی ویزا اور انسٹیٹیوٹ کا ایڈمیشن لیٹر علی نامی ایجنٹ سے حاصل کیے تھے۔ ایف آئی اے نے ملزم کو مزید کارروائی کے لیے اے ایچ ٹی سی کراچی منتقل کر دیا ہے۔
