غزہ : غزہ میں الجزیرہ ٹی وی کے بیوروچیف وائل الدحدوح کے گھر پر اسرائیلی فضائی حملے میں پورا خاندان شہید ہوگیا ، شہید ہونے والوں میں اہلیہ، بیٹا اور سات سالہ بیٹی شامل ہیں۔
تفصیلات کے مطابق وحشی اسرائیلی فوج کے ہاتھوں شہید ہونے والے فلسطینیوں کی تعداد میں ہرگزرتے دن کےساتھ اضافہ ہورہا ہے۔
اسرائیلی جارحیت سے پردہ اٹھانے والے صحافی وائل الدحدوح کے اہلخانہ کو شہید کردیا گیا، الجزیرہ ٹی وی کے غزہ میں بیوروچیف کی رہائش گاہ پر اسرائیلی فضائی حملہ ہوا، حملے میں اُن کی اہلیہ، ہائی اسکول میں پڑھنے والا بیٹا اور سات سالہ بیٹی شہید ہوگئی۔
عرب میڈیا رپورٹس کے مطابق الجزیرہ چینل کے نمائندے کا خاندان النصیریہ کے پناہ گزین کیمپ میں موجود تھا۔
خاندان کی شہادت کے بعد الجزیرہ چینل کے نمائندے کی شہید ننھی بیٹی کو گود میں اٹھائے اسپتال سے نکلنے اور شہید بیٹے کی میت کو دیکھنے کی ویڈیوز وائرل ہورہی ہے۔
دوسری جانب الجزیرہ کے تجربہ کار صحافی وائل دہدوح اور ان کے خاندان کی گانا گاتے ہوئے ایک پرانی ویڈیو بھی وائرل ہورہی ہے ، جس میں ان کے خاندان کے عزم و حوصلے دیکھنے والوں کی حوصلے بڑھا رہے ہیں۔
خیال رہے فلسطین سےمتعلق حقائق بیان کرنےپرالجزیرہ ٹی وی کومشکلات کاسامنابھی ہے ، اسرائیل پہلےہی الجزیرہ ٹی وی کی نشریات بنداورسامان ضبط کرچکا ہے۔
واضح رہے اسرائیل کی وحشیانہ بمباری سے شہیدوں کی تعداد ساڑھے چھ ہزارسےزائد ہوگئی ہے ، شہیدوں میں ستائیس سوسےزائدبچےاورپندرہ سوسےزائد خواتین ہیں جبکہ اٹھارہ ہزار فلسطینی زخمی ہیں۔
