وزیرآباد: عمران خان کے کنٹینر پر حملے میں جاں بحق معظم گوندل کے گھر والے غم سے نڈھال ہیں، گوندل ایک ماہ پہلے ہی کویت سے واپس آیا تھا۔
تفصیلات کے مطابق عمران خان کے کنٹینر پر حملے میں جاں بحق معظم گوندل کے گھر صف ماتم بچھ گئی۔
وزیرآباد کا رہائشی معظم گوندل ایک ماہ پہلے ہی کویت سے واپس آیا تھا، اہل خانہ نے بتایا ہے معظم گوندل پی ٹی آئی چیئرمین عمران خان سے جنون کی حد تک محبت کرتا تھا۔
اہلخانہ کا کہنا تھا کہ معظم اپنےآبائی گاؤں سے دوستوں کےہمراہ لانگ مارچ میں شریک تھا، مقتول معظم کے تین بچے ہیں جولانگ مارچ میں والد کے ساتھ موجود تھے۔
ماموں الیاس گوندل نے کہا کہ مقتول معظم دوبیٹوں اورایک بیٹی کاباپ تھا جبکہ مقتول معظم کےدوبھائی اور3بہنیں ہیں۔
یاد رہے عمران خان پر قاتلانہ حملے میں ابتسام نامی نوجوان نے فائرنگ کرنے والے ملزم کو پیچھے سے پکڑا، جس کے بعد ملزم بھاگا تو معظم گوندل نے اسے پکڑنےکی کوشش کی تو ملزم نے فائرنگ کردی۔
گولی معظم کے سرمیں لگی وہ وہیں گر کر جاں بحق ہوگیا، جس کے بعد بھگدڑ مچ گئی، لوگ جان بچا کر بھاگنے لگے لیکن معظم کے تین معصوم بچے باپ کو اٹھانے کی کوشش کرتے رہے۔
