فرح خان نے اپنے خلاف درج مقدمات پر ڈی جی اینٹی کرپشن کو درخواست دی ہے جس میں کہا گیا ہے کہ پلاٹوں کے لین دین سے متعلق معاملہ اینٹی کرپشن کے اختیار میں نہیں آتا۔
اے آر وائی نیوز کے مطابق سابق خاتون اول بشریٰ بی بی کی قریبی دوست فرح خان نے اپنے خلاف اینٹی کرپشن میں درج مقدمات کے معاملے پر وکیل اظہر صدیق کی معرفت ڈی جی اینٹی کرپشن کو درخواست جمع کرائی ہے جس میں کہا گیا ہے کہ پلاٹوں کے لین دین سے متعلق معاملہ اینٹی کرپشن کے اختیار میں نہیں آتا، سیاسی انتقام کانشانہ بنایا جا رہا ہے، اینٹی کرپشن نے مقدمات درج کیے لیکن مقدمات کی نقول فراہم نہیں کیں، اینٹی کرپشن مقدمات واپس لے ورنہ اعلیٰ عدالت سے رجوع کیا جائے گا۔
فرح خان کی جانب سے دی گئی درخواست میں موقف اختیار کیا گیا ہے کہ پلاٹ قانونی طور پر مارکیٹ ریٹ سے زائد پیسے دیکر خریدا گیا جس کی ایک قسط ادا کردی گئی ہے اسکے بعد حکم امتناع جاری ہوچکا ہے، ایاز صادق نے بھی فیڈمک میں پلاٹ لیا لیکن انہوں نے مجھ سے بھی کم قیمت ادا کی، اینٹی کرپشن کے پاس اس کیس میں تحقیقات کا اختیار نہیں۔
