اسلام آباد : رکن کمیٹی فاروق ایچ نائیک نے نئے چیف جسٹس کے انتخاب کے حوالے سے بتایا کہ چیف جسٹس کیلئے قابلیت کو دیکھا جائے گا۔
تفصیلات کے مطابق خصوصی پارلیمانی کمیٹی کے رکن فاروق ایچ نائیک نے اے آر وائی نیوز کے پروگرام میں خصوصی گفتگو کرتے ہوئے کہا کہ نئے چیف جسٹس کیلئے قابلیت کو دیکھا جائے گا، اچھی پرفارمنس والا چیف جسٹس بنے گا۔
کمیٹی کے رکن کا کہنا تھا کہ خصوصی پارلیمانی کمیٹی میں پی ٹی آئی کے رہنما بھی شامل ہیں، خصوصی پارلیمانی کمیٹی کوتھوڑا وقت دینا چاہیے۔
سینیٹر فاروق نے کہا کہ پہلے 3 سینئر ججز میں سے کسی ایک کوچیف جسٹس پاکستان بنایا جائے گا۔
انھوں نے بتایا کہ سپریم کورٹ نے آرٹیکل 63 اے پر فیصلہ دیا تھا کہ ووٹ شمارنہیں ہوگا جبکہ آئین میں توکہیں نہیں لکھا ہوا کہ ووٹ کاؤنٹ نہیں ہوگا۔
رکن کمیٹی کا مزید کہنا تھا کہ سب کوعلم ہے سپریم کورٹ تقسیم ہوچکی ہے، انتظار کرنا چاہیے کہ آئینی ترامیم جو ہوئی ہیں وہ ملک کیلئے بہترہوں گی یا نہیں، ترامیم کو چیلنج کرنیوالے چیلنج کریں گے۔