لاہور: تحریک انصاف کے رہنما فرخ حبیب کا کہنا ہے کہ توشہ خانہ کیس سننے والے جج ہمایوں دلاور نے اپنافیس بک اکاؤنٹ تسلیم کرلیا، پوسٹیں نہیں تھی تو اتنے سال فیس بک پیج پر رہی۔
تفصیلات کے مطابق تحریک انصاف کے رہنما فرخ حبیب نے اپنے بیان میں کہا کہ توشہ خانہ کیس سننے والے جج ہمایوں دلاور نے اپنافیس بک اکاؤنٹ تسلیم کرلیا ،یہ کیسے ہوسکتاہے کہ فیس بک اکاؤنٹ جج کا ہو پوسٹیں ان کی نہ ہوں، پوسٹیں نہیں تھی تو اتنے سال فیس بک پیج پر رہی ،ڈیلیٹ کیوں نہیں کیا۔
فرخ حبیب کا کہنا تھا کہ ہمایوں دلاور عجلت میں شفاف ٹرائل کے حق کو مسترد کرکے کاروائی آگے بڑھا رہے ہیں، ہمایوں دلاور کے غیر جانبداری پر سنجیدہ اعتراضات درست لگتے ہیں، فیئر ٹرائل کا تقاضا ہے کہ جج ہمایوں دلاور کیس کی مزیدسماعت نہ کریں۔
خیال رہے توشہ خانہ کیس میں اسلام آباد کی ڈسٹرکٹ اینڈ سیشن کورٹ نے چیئرمین پی ٹی آئی کی جانب سے دائر آج حاضری سے استثنیٰ اور جج ہمایوں دلاور پر عدم اعتماد کی درخواستوں کے قابلِ سماعت ہونے پر فیصلہ محفوظ کرلیا ہے
جج ہمایوں دلاور نے کہا کہ پی ٹی آئی جیسےٹرالنگ کرتی ویسےہی گوہرعلی خان نےبھی ٹرالنگ کی، فیس بک اکاؤنٹ میرا ہی ہے لیکن یہ پوسٹیں میری نہیں، آپ فرانزک کراسکتےہیں۔
چیئرمین پی ٹی آئی کے وکیل بیرسٹرگوہر کا کہنا تھا کہ آپ کے نام فیس بک اکاؤنٹ ہے جہاں چیئرمین پی ٹی آئی کےخلاف پوسٹیں لگی ہیں، جب تک انکوائری مکمل نہیں ہوتی تب تک یہ کیس سننامناسب نہیں۔
