لاڑکانہ: منی لانڈرنگ کیس میں پی پی رہنما فریال تالپور کی 6 روزہ حفاظتی ضمانت منظور کرلی گئی اور ایف آئی اے کیس میں فریال تالپور کو 29جولائی کوپیش ہونے کی ہدایت بھی کی۔
تفصیلات کے مطابق سابق صدر آصف زرداری کی بہن فریال تالپور وکلا کے ساتھ قبل ازضمانت گرفتاری کیلئے ہائی کورٹ بینچ پہنچیں
جہاں ان کے وکیل فاروق ایچ نائیک نے درخواست ضمانت دائر کی۔
درخواست میں کہا گیا کہ آصف زرداری وفریال تالپورالیکشن میں حصہ لے رہے ہیں، ایف آئی اے کا کیس بدنیتی پرمبنی اور انتقامی کارروائی ہے اور الیکشن سے دوررکھنے کی سازش کی جارہی ہے۔
ہائی کورٹ بینچ نے پیپلزپارٹی کی رہنما کے موقف کو تسلیم کرتے ہوئے ان کی 6 روزہ حفاظتی ضمانت منظور کرلی اور ایف آئی اے کیس میں فریال تالپور کو29 جولائی کوپیش ہونے کی ہدایت بھی کی۔
مزید پڑھیں : ایف آئی اے نے آصف زرداری اور فریال تالپور کو مفرور قرار دے دیا
گزشتہ روز وفاقی تحقیقاتی ایجنسی (ایف آئی اے) نے منی لانڈرنگ کیس میں گرفتار نجی بینک کے سربراہ حسین لوائی کے خلاف چالان جمع کرایا جس میں آصف زرداری اور فریال تالپور کو مفرور ملزم قرار دیا گیا تھا۔
کیس چالان کے مطابق مفرور افراد کی فہرست میں آصف علی زرداری اور فریال تالپور کا نام 19 اور 20 ویں نمبر پر درج کیا گیا۔
یاد رہے کہ اسی کیس میں ایف آئی اے اور سپریم کورٹ نے آصف زرداری اور ان کی ہمشیرہ فریال تالپور کو طلب کیا تھا تاہم دونوں شخصیات نے اپنے وکلا کے ذریعے جواب جمع کرایا تھا ۔
جس میں سابق صدر آصف علی زرداری اور فریال تالپور نے ایف آئی ا ے سے پیش ہونے کیلئے الیکشن کے ایک ہفتے بعد کا وقت مانگ لیا تھا اور جواب میں کہا تھا کہ آصف علی زرداری انتخابی سرگرمیوں کی وجہ سے مصروف ہیں، 25جولائی کے بعد تمام سوالوں کے جواب دیں گے۔
سپریم کورٹ نے ایف آئی اے کو دونوں شخصیات کو الیکشن تک طلب کرنے سے روک دیا ہے۔
خیال رہے کہ فریال تالپور سندھ اسمبلی کے حلقہ پی ایس 10 لاڑکانہ ون سے الیکشن لڑ رہی ہے۔
