اسلام آباد : احتساب عدالت نے جعلی اکاؤنٹس کیس میں سابق صدر آصف زرداری کی ہمشیرہ فریال تالپور کے جسمانی ریمانڈ میں 29 جولائی تک مزید توسیع کردی۔
تفصیلات کے مطابق اسلام آباد کی احتساب عدالت میں میگا منی لانڈرنگ کیس کی سماعت ہوئی، جس سلسلے میں سابق صدر آصف زرداری اور ان کی ہمشیرہ فریال تالپور کو عدالت میں پیش کیا گیا اور ملزمان کی حاضری لگائی گئی۔
پی پی رہنماؤں کے وکیل فاروق ایچ نائیک نے آصف زرداری اور فریال تالپور سے ملاقات کی درخواست کی، جسے عدالت نے منظور کرلیا۔
دوران سماعت نیب نے احتساب عدالت سےفریال تالپور کے جسمانی ریمانڈ میں 14 روزہ ریمانڈ میں توسیع کی درخواست کی، جس پر عدالت نےفریال تالپور کو 6 اگست کو دوبارہ پیش کرنے کا حکم دے دیا۔
فریال تالپور کےوکیل نے کہا کہ یہ پندرہ روز بنتے ہیں،عدالت نے کہا کہ پانچ اگست کو اتوار ہے، سوموار کو پیش کیاجائے۔
بعد ازاں احتساب عدالت نے فریال تالپور کے جسمانی ریمانڈ کی تاریخ تبدیل کرتے ہوئے ریمانڈ سات روزہ کردیا اور فریال تالپور کے جسمانی ریمانڈ میں 29 جولائی تک توسیع کردی۔
یاد رہے 10 جون کو جعلی بینک اکاؤنٹس کیس میں اسلام آباد ہائی کورٹ نے سابق صدر آصف زرداری اور فریال تالپور کی درخواست ضمانت مسترد کردی تھی اور گرفتار کرنے کا حکم دیا تھا، جس کے بعد 14 جون کو فریال تالپور کو جعلی اکاؤنٹس کیس میں نیب نے گرفتار کیا اور ان کی رہایش گاہ کو سب جیل قرار دیا تھا۔
