لاس اینجلس : ایکشن اور تھرلر سے بھرپور شہرہ آفاق فلم "فاسٹ اینڈ فیوریس 9” نے کامیابی کے جھنڈے گاڑدیئے، اس فلم کی نمائش سے کورونا سے متاثرہ امریکی سنیما میں دوبارہ جان پڑنے کی امید ہے۔
دنیا بھر میں کورونا وائرس کی تباہ کاریوں کے سبب جہاں کئی ممالک کی معاشی صورتحال خراب ہوئی ساتھ ہی تفریحی سرگرمیاں بھی نہ ہونے کے برابر رہ گئیں جس کے باعث فلم انڈسٹری سے وابستہ افراد کو بھی شدید مالی مشکلات کا سامنا کرنا پڑا۔
تاہم اب صورتحال کسی حد تک بہتری کی جانب جارہی ہے کیونکہ نئی آنے والی فلم سے امریکی سنیماؤں کی رونقیں دوبارہ لوٹ آئیں گی، تجزیہ نگاروں کا کہنا ہے کہ سیریز فاسٹ اینڈ فیوریس کی نویں فلم ایف9 سے امریکی سنیما میں دوبارہ جان پڑنے کی امید ہے۔
یہ گزشتہ دو سالوں میں کورونا وائرس کے باعث پہلی بڑے بجٹ کی فلم ہوگی جو سلور اسکرین پر ریلیز کی جارہی ہے۔
سنیما مالکان کا ماننا ہے کہ اس کی وجہ سے سنیما کی رونقیں دوبارہ بحال ہوجائیں گی اور فلم کی ٹکٹوں کی بکنگ سنیما کو دوبارہ اٹھنے میں مدد کرے گی جو اس وقت بند ہونے کے دہانے پر ہیں۔
فلم پروڈیوسر اور ڈائریکٹر جسٹن لِن کا کہنا ہے کہ ہمارا اس طرح کی فلمیں بنانے کا مقصد ہوتا ہے، یہ لوگوں کے لیے ہوتی ہیں، تاکہ لوگ اپنے اہلِ خانہ اور دوستوں کے ہمراہ سنیما جائیں اور انھیں ساتھ میں تفریح میسر آئے۔
ایف9 میں جان سینیا ایکشن میں دکھائی دیں گے اور وہ فلم میں ولن کا کردار ادا کر رہے ہیں، جبکہ اس میں فلم کے نامور کردار ہان (سنگ کینگ) کو دوبارہ لایا گیا ہے۔
یاد رہے کہ فاسٹ اینڈ فیوریس 9 نے چین کے سنیما گھروں میں بھی کھڑکی توڑ رش رہا۔ ایف نائن نے پہلے دن کورونا وبا کے دوران ریکارڈ 6 کروڑ 90لاکھ ڈالرسے زائد کمالیے۔ فلم نے ریلیز میں مجموعی طور پر سات کروڑ ڈالر سے زائدکا بزنس ریکارڈ کیا ہے۔