لاہور : فاسٹ بولرنسیم شاہ کی انڈر19 کرکٹ ورلڈ کپ میں شمولیت سوالیہ نشان بن گئی، ہیڈ کوچ اعجازاحمد نے نسیم شاہ کی ضرورت قرار دے دیا جبکہ سینئر ٹیم منیجمنٹ انہیں ریلیز کرنے کے لئے تیار نہیں۔
تفصیلات کے مطابق فاسٹ بولرنسیم شاہ کی انڈرنائنٹین کرکٹ ورلڈ کپ اور قومی ٹیم میں شمولیت کے لئے سینئیر اور جونئیر ٹیم منیجمنٹ میں کھینچا تانی شروع ہوگئی۔
نسیم شاہ کی آئندہ ماہ جنوبی افریقہ میں ہونے والے انڈرنائنٹین ورلڈ کپ میں شرکت غیر یقینی صورتحال سے دوچار ہے۔ میگا ایونٹ کیلئے نسیم شاہ کا نام اسکواڈ میں شامل ہے لیکن سینئر ٹیم منیجمنٹ انہیں ریلیز کرنے کے لئے تیار نہیں ہے۔
اس حوالے سے جونئیر ٹیم کے ہیڈ کوچ اعجازاحمد نے انڈر19ورلڈکپ کیلئےنسیم شاہ کو مانگ لیا، ان کا کہنا ہے کہ ٹیم کو نسیم شاہ کی ضرورت ہے.
اس کیلئے انہوں نے قومی ٹیم کے چیف سلیکٹر و ہیڈ کوچ مصباح الحق سے درخواست کی ہے کہ نسیم شاہ کو ریلیز کر دیا جائےبنگلہ دیش سے ٹیسٹ سیریزمیں نسیم شاہ کی شمولیت پر کوئی اعتراض نہیں لیکن اگر سیریز تاخیر کا شکار ہے تو نسیم کو انڈرنائنٹین کیلئے دستیاب ہونا چاہیے۔
مزید پڑھیں : فاسٹ بولر نسیم شاہ نے عالمی ریکارڈ بنا ڈالا
اعجاز احمد کا کہنا تھا کہ نسیم شاہ کے ریلیز نہ ہونے کی صورت میں ایک دو فاسٹ باﺅلرز کے بارے میں سوچا ہوا ہے جو گزشتہ25 روز سے میرے ساتھ ہیں اور ٹریننگ کر رہے ہیں لیکن اگر نسیم شاہ کو ریلیز کر دیا جاتا ہے تو بہت اچھا ہو گا کیونکہ قومی ٹیم کے پاس ٹی 20 فارمیٹ میں کھیلنے کیلئے بہت سے فاسٹ باﺅلرز موجود ہیں۔
