The news is by your side.

Advertisement

امریکا جاپان کے فوگاکو سپر کمپیوٹر سے آگے نہ نکل سکا

ٹوکیو: امریکا اس بار بھی جاپان کے فوگاکو سپر کمپیوٹر سے آگے نہ نکل سکا، فُوگاکُو نے دنیا کا تیز ترین سُپر کمپیوٹر ہونے کا اعزاز برقرار رکھا۔

تفصیلات کے مطابق پیر کے روز جاپان کے سُپر کمپیوٹر فُوگاکُو نے مسلسل چوتھی بار دنیا کے تیز ترین سُپر کمپیوٹر ہونے کا اعزاز برقرار رکھا ہے۔

تحقیقی ادارے ریکین اور الیکٹرانکس کمپنی فُوجِتسُو کے اشتراک سے بنائے گئے فُوگاکُو نے تازہ ترین رینکنگ میں تمام 4 کیٹیگریز میں پہلی پوزیشن حاصل کی۔

حساب لگانے کی رفتار کی کیٹیگری میں فُوگاکُو نے دوسرے نمبر پر رہنے والے امریکی مدمقابل کمپیوٹر سے تقریباً تین گنا زیادہ رفتار سے، یعنی 44 لاکھ کھرب سے زائد حساب کتاب فی سکینڈ کیے۔

تین دیگر کیٹیگریز میں، صنعتی استعمال کے لیے حساب کتاب کے طریقہ کار میں کارکردگی، مصنوعی ذہانت اور بڑے پیمانے پر موجود اعداد و شمار کا تجزیہ شامل تھا۔

ریکین سینٹر فار کمپیوٹیشنل سائنس کے ڈائریکٹر ماتسُواوکا ساتوشی نے کہا کہ فُوگاکُو نے اپنی اعلیٰ کارکردگی کا ثبوت ایک بار پھر پیش کر دیا ہے، امید ہے کہ یہ سُپر کمپیوٹر کاربن فری سوسائٹی کے قیام میں مددگار ثابت ہوگا۔

واضح رہے کہ ماہرین کے ایک بین الاقوامی اجلاس میں سُپر کمپیوٹرز کی بین الاقوامی رینکنگ کا ہر 6 ماہ بعد اعلان کیا جاتا ہے۔

Comments

یہ بھی پڑھیں