اسلام آباد: پاکستان، فنانشل ایکشن ٹاسک فورس (ایف اے ٹی ایف) کی گرے لسٹ میں رہے گا یا نکل جائے گا، اس کا فیصلہ ایف اے ٹی ایف کے حالیہ اجلاس میں ہوگا جو 16 فروری سے شروع ہونے جارہا ہے۔
تفصیلات کے مطابق فنانشل ایکشن ٹاسک فورس (ایف اے ٹی ایف) کا 5 روزہ پلینری اجلاس 16 فروری سے پیرس میں ہوگا، پاکستان کے گرے لسٹ میں رہنے یا نکل جانے کا فیصلہ اسی اجلاس میں ہوگا۔
ذرائع کا کہنا ہے کہ بیجنگ اجلاس میں بھارت کی جانب سے پاکستان کو گرے لسٹ سے نکالنے کی مخالفت کی گئی تھی تاہم بیجنگ اجلاس میں امریکا اور یورپی یونین نے پاکستانی اقدامات کو سراہا تھا۔
ذرائع کے مطابق پاکستان کو پہلے ہی چین، ترکی اور ملائشیا کی بھرپور حمایت حاصل ہے، سفارتی مہم کے نتیجے میں بھی کچھ ممالک سے حمایت ملنے کی قوی امید ہے۔
ایف اے ٹی ایف نے پاکستان کو جون 2018 میں گرے لسٹ میں شامل کیا تھا، اس دوران پاکستان نے بیشتر نکات اور ایکشن پلانز پر عمل یقینی بنایا اور ٹھوس اقدامات کیے۔
پاکستان کو ستمبر 2019 میں مزید بہتری کے لیے 31 دسمبر کا وقت دیا گیا تھا۔
خیال رہے کہ رواں برس جنوری کے اواخر میں ایف اے ٹی ایف اور پاکستان کے درمیان مذاکرات میں، پاکستان کو ایکشن پلانز پر عمل درآمد کے لیے 31 مارچ تک مزید وقت دیا گیا تھا۔
ذرائع کے مطابق پاکستان کو عمل درآمد سے متعلق سہ ماہی رپورٹ 31 مارچ سے پہلے جمع کروانا ہوگی اور میوچیول ایولیو ایشن کا فروری میں ہونے والے اجلاس سے کوئی تعلق نہیں۔
رواں ماہ ہونے والا اجلاس 27 نکاتی ایکشن پلان پر عمل درآمد پر ہوگا جبکہ میوچیول ایولیو ایشن کا اجلاس اگست میں ہوگا۔
