The news is by your side.

Advertisement

کراچی : باپ کے قتل میں ملوث بیٹا ڈرامائی انداز میں گرفتار

کراچی : سفاک بیٹا 80 سالہ باپ کو قتل کرکے نامعلوم افراد کیخلاف مقدمہ درج کرانے کلفٹن تھانے پہنچ گیا، پولیس نے کمال ہوشیاری سے ملزم سے سچ اگلوالیا۔

کراچی کے علاقے کلفٹن شیریں جناح کالونی میں 80 سالہ شخص کے قتل کا واقعہ پیش آیا  ہے یہ قتل کسی اور نے نہیں بلکہ مقتول کے بیٹے نے کیا۔

جلاد بیٹے نے پہلے80سالہ بوڑھے باپ شہزاد گل کو قتل کیا اور پھرخود ہی مظلوم بن کر مقدمہ درج کرانے تھانے پہنچ گیا، ملزم یاسر نے باپ کو قتل کرکے نامعلوم افراد کیخلاف مقدمہ درج کرادیا۔

لیکن اس کی چالاکی زیادہ دیر نہ چل سکی اور پولیس نے ابتدائی تفتیش کے دوران ہی ملزم کی ہوشیاری پکڑلی، اور مقتول کے بیٹے یاسر کو قتل کے الزام میں گرفتار کرلیا۔

اس حوالے سے ایس ایس پی ساؤتھ شیراز نذیر نے میڈیا کو بتایا کہ80سالہ شہزاد گل کی لاش گزشتہ روز ملی تھی، ملزم یاسر نے اپنے بوڑھے والد کو گھریلو تنازع پر قتل کیا ہے۔

پولیس کے مطابق ملزم یاسر پسند کی شادی کرنا چاہتا تھا جس پر اس کا والد راضی نہیں تھا، اس کے علاوہ باپ کی جانب سے گھر فروخت کرنے کے حوالے سے بھی تنازع چل رہا تھا، ملزم نے قتل کے بعد تھانے آکر نامعلوم کے خلاف مقدمہ درج کرایا۔

Comments

یہ بھی پڑھیں