آل راؤنڈر ندا ڈار کی انجری کے بعد فاطمہ ثنا کو نیوزی لینڈ ویمنز کرکٹ ٹیم کے خلاف دوسرے ون ڈے انٹرنیشنل میچ میں کپتان مقرر کیا گیا ہے۔
تفصیلات کے مطابق پاکستان ویمنز ٹیم کی کھلاڑی فاطمہ ثنا نیوزی لینڈ ویمنز کرکٹ ٹیم کے خلاف دوسرے ون ڈے انٹرنیشنل میچ میں کپتانی کریں گی، وہ پاکستان ویمنز ٹیم کی ون ڈے انٹرنیشنل میں قیادت کرنے والی 10ویں کپتان بن گئیں۔
قومی کرکٹ ٹیم کی آل راؤنڈر و کپتان ندا ڈار نیوزی لینڈ ویمنز کرکٹ ٹیم کے خلاف دوسرے ون ڈے انٹرنیشنل سے باہر ہو گئی ہیں۔
پاکستان ویمنز کی کپتان ندا ڈار دوران میچ زخمی
ندا ڈار نے منگل کو کوئنزٹاؤن کے جان ڈیوس اوول میں پہلے ون ڈے انٹرنیشنل میں ٹیم کی قیادت کی، جہاں نیوزی لینڈ بیٹنگ کے 44 ویں اوور میں گیند لگنے سے زخمی ہو کر میدان سے باہر چلی گئیں تھیں۔
اس کے بعد فاطمہ ثنا کو اسٹینڈ ان کپتان مقرر کیا گیا، بورڈ کا کہنا ہے کہ تیسرے ون ڈے انٹرنیشنل کے لیے ندا ڈار کی دستیابی کا تعین بعد میں کیا جائے گا۔
22 سالہ فاطمہ ثنا نے مئی 2019 میں جنوبی افریقہ کے خلاف سیریز میں اپنے بین الاقوامی کیریئر کا آغاز کیا تھا، جب وہ کل کرائسٹ چرچ میں ٹاس کے لیے جائیں گی تو وہ ون ڈے انٹرنیشنل فارمیٹ میں پاکستان ویمنز ٹیم کی 10ویں کپتان بن جائیں گی۔
فاسٹ باؤلر نے انجری کی باعث حالیہ بنگلہ دیش سیریز سے باہر ہونے کے بعد، شاندار واپسی کرتے ہوئے نیوزی لینڈ ویمنز کرکٹ ٹیم کے خلاف 3 سے 9 دسمبر تک کھیلے گئے تین ٹی ٹوئنٹی انٹرنیشنل میچوں کی سیریز کی بہترین کھلاڑی کا اعزاز حاصل کیا۔
ندا ڈار سے قبل فاسٹ باؤلر ڈیانا بیگ سیریز سے قبل پریکٹس سیشن کے دوران انگلی میں چوٹ لگنے کی وجہ سے ون ڈے انٹرنیشنل سیریز سے باہر ہو گئی تھیں۔
