سابق وفاقی وزیر فواد چوہدری نے کہا ہے کہ بشریٰ بی بی سے اپیل ہے بانی پی ٹی آئی کی رہائی کیلئے حکمت عملی بنائیں۔
فواد چوہدری نے انسداد دہشتگری عدالت لاہور کے باہر میڈیا سے گفتگو کرتے ہوئے کہا کہ پی ٹی آئی کا کوئی لیڈر کمروں سے باہر نہیں نکل رہا ، کارکن عدالتوں میں دھکے کھا رہے ہیں۔
ان کا کہنا تھا کہ حکومت نے ہمیں جعلی مقدمات میں پھنسایا ہوا ہے، ہم پر مشکل وقت ہے اور ہم اس سے گزررہے ہیں، سلمان اکرم راجہ، رؤف حسن پر کونسا مشکل وقت آیا، ہمارا صبح کا شیڈول یہی نکلتا ہے آج کس عدالت جاناہے۔
فوادچوہدری کا کہنا تھا کہ پاکستان کی جیلیں تحریک انصاف سے بھر چکی ہیں میری بشریٰ بی بی سے اپیل ہے وہ بانی پی ٹی آئی کی رہائی کیلئے حکمت عملی بنائیں، بشریٰ بی بی اور علیمہ خان آگے بڑھیں اور قیادت کا ساتھ دیں۔
ان کا کہنا تھا کہ بشریٰ بی بی، علیمہ خان سیاست میں آئیں اور پارٹی بچائیں، بانی پی ٹی آئی کی رہائی کیلئے کوئی حکمت عملی نہیں، بانی پی ٹی آئی کو بتایا ہی نہیں جارہا کہ کیا ہورہا ہے،
فواد چوہدری نے مزید کہا کہ ہمارے لئے بجلی کا بل دینا مشکل ہوگیا اور یہ کہتے معیشت اوپر جا رہی ہے، ملک میں تنخواہ دار طبقے اور ورکنگ کلاس کی کمر ٹوٹ گئی ہے۔
