اسلام آباد : سابق وفاقی وزیر فواد چوہدری کا کہنا ہے کہ پیپلز پارٹی سے اتحاد کرنا ہوتا تو بہت پہلے کرچکے ہوتے، پیپلز پارٹی سے اتحاد کر کے حکومت بنانے سے بہتر ہے ہم اپوزیشن میں بیٹھ جائیں۔
تفصیلات کے مطابق سابق وفاقی وزیر فواد چوہدری نے اے آر وائی نیوز نے خصوصی گفتگو کرتے ہوئے کہا کہ پیپلزپارٹی سے اتحادی حکومت کے بجائے اپوزیشن میں بیٹھ جائیں ، اگرپیپلزپارٹی سے اتحاد کرنا ہوتا تو بہت پہلے کرچکے ہوتے۔
فواد چوہدری کا کہنا تھا کہ میں نے خان صاحب سے پیپلز پارٹی سے رابطہ کرنے کا کہا تو عمران خان کا کہنا تھا کہ پیپلز پارٹی سے اتحاد کرنےسے بہتر ہے ہم اپوزیشن میں بیٹھ جائیں، زرداری صاحب کرپشن کی علامت ہیں۔
لانگ مارچ کے حوالے سے رہنما پی ٹی آئی نے کہا کہ ہرجگہ سےلوگ لاکھوں کی تعدادمیں نکلےتھے، جلسوں میں بھی لوگوں کی بڑی تعدادموجودتھی، حکومت کی جانب سے جورویہ اختیار کیا گیا وہ درست نہیں تھا۔
ان کا کہنا تھا کہ قومی جماعت کو دیوار سے لگاتے وقت ریاست کو سوچنا ہوگا اس حد تک دیوارسے نہ لگائیں کہ قومی جماعت احتجاج سے پہلے میلیٹنٹ ونگ بنانے کا سوچے ، بڑی پارٹی کو نیچے کرنے کی کوشش کریں گے تو ایسا ہی ہوگا۔
حکومت پر تنقید کرتے ہوئے سابق وزیر نے کہا کہ ان کے حکومت میں آنے کا مقصد خود کو این آراو دینا تھا، یہ صرف اپنے کیسز سے جان چھڑانے کیلئے حکومت میں آئے۔
