اسلام آباد : سابق وزیر فواد چوہدری کا کہنا ہے کہ ن لیگ کے ٹکٹ پر الیکشن لڑنے والے 19 لوٹوں کی تاحیات نااہلی کے لیے عدالت جا رہے ہیں۔
تفصیلات کے مطابق سابق وزیر فواد چوہدری نے پریس کانفرنس کرتے ہوئے کہا کہ جس طرح ساون میں مینڈک باہرنکلتےہیں آج کل ن لیگی وزرا نکلے ہیں، ان کی پریس کانفرنسز سے گھبراہٹ کا اندازہ ہو رہا ہے، اس وقت ن لیگ میں گھبراہٹ کاماحول چل رہا ہے۔
فواد چوہدری کا کہنا تھا کہ ن لیگ سے کہتا ہوں کہ آپ نے گھبرانا ہے، آپ کے آخری دن ہیں اپنے دن گننا شروع کردیں۔
سابق وزیر نے کہا کہ مریم نواز کی ٹوئٹ ہے پنجاب کی عوام کومفت بجلی دینا چاہ رہے تھے، آپ تومہنگی بجلی نہیں دے پا رہے مفت کیا دیں گے، اتنی مہنگی بجلی کے باوجود نہیں دے پا رہے لوگوں کوبیوقوف سمجھتےہیں؟
ن لیگی حکومت پر تنقید کرتے ہوئے ان کا کہنا تھا کہ ن لیگ کی سیاست کاالمیہ یہ ہے کہ آپ لوگوں کو بیوقوف سمجھتے ہیں، آپ نے ن لیگ کی سیاست ختم کر دی ہے ، آپ سے بجلی مہنگی بھی نہیں دی جارہی سستی آپ نے کہاں سے دینی ہے، ساون میں 8سے 10 گھنٹے کی لوڈشیڈنگ کر رہے ہیں۔
فواد چوہدری نے کہا کہ 24گھنٹے فرح کی تسبیح سے مسئلے حل نہیں ہونے ، آپ اپنے دن گنیں ، دنیا کا ہر دو نمبرآ دمی شہباز شریف کا بزنس پارٹنر بنا ہوا ہے۔
سابق وزیر کا کہنا تھا کہ حمزہ شہباز کی حکومت صرف10دن کی مہمان ہے ، 22 جولائی کو پنجاب میں پی ٹی آئی اور ق لیگ کی حکومت ہوگی، ن لیگ ٹکٹ پر جو 19 لوٹے الیکشن لڑ رہے ہیں ان کیخلاف ہائیکورٹ جارہے ہیں۔
انھوں نے مزید کہا کہ پنجاب کی 20سیٹوں پرالیکشن ہوناہے، ن لیگ کے ورکرز لوٹوں کوووٹ دینے کو تیار نہیں، پنجاب میں پی ٹی آئی کا مقابلہ آزاد امیدواروں کیساتھ ہے۔
فواد چوہدری کا کہنا تھا کہ ایک بلب روزانہ رات کو جلائیں گے تو 100یونٹ ایسے ہی پورے ہوجائیں گے، حمزہ شہباز کا 100یونٹ پر بجلی مفت دینے کا اعلان فراڈ ہے۔
بھارت کے حوالے سے رہنما پی ٹی آئی کا کہنا تھا کہ ہندوستان میں صحافیوں کیساتھ بدترین سلوک ہورہا ہے، بھارت میڈیا کی طرف سے صحافیوں کی آواز دبائی جارہی ہے، ان کے منہ سے ہندوستانی صحافیوں کیلئے ایک لفظ نہیں نکل رہا۔
انھوں نے کہا کہ بلاول کو وزیر خارجہ لگا دیا وہ کہتا ہے ہندوستان سے تعلقات بحال کرنے ہیں، پہلے ہندوستان میں ظلم کیخلاف تو آواز بلند کرو، ہندوستان میں مسلمانوں، مسیحی برادری پر ظلم کے پہاڑ توڑے جا رہے ہیں، دنیا کا ہر مسلمان خصوصاً پاکستان ہندوستان میں مسلمانوں پر ظلم کی مذمت کرتا ہے۔
عمران ریاض کی گرفتاری کے حوالے سے سابق وزیر کا کہنا تھا کہ سپریم کورٹ نے کہا تھا ایک ہی کیس میں 17 ایف آئی آر ہوں گی تو ایک گرفتاری ہوگی، عمران ریاض کورات ایک عدالت سےدوسری پھرتیسری عدالت لیکرجایاگیا، عمران ریاض نے دلیری سے مصیبتوں کا مقابلہ کیا ہے ، انشااللہ عمران ریاض رہا ہوں گے اور ظلم کی زنجیرٹوٹے گی۔
