The news is by your side.

وفاقی حکومت 35 ارکان کے استعفےٰ قبول کرکے ہمارے گیم میں آگئی ، فواد چوہدری

لاہور : تحریک انصاف کے رہنما فواد چوہدری کا کہنا ہے کہ وفاقی حکومت35 ارکان کے استعفےٰ قبول کرکے ہمارے گیم میں آگئی ، اگلے 90 دنوں میں 60 فیصد ملک الیکشن کی طرف جائے گا۔

تفصیلات کے مطابق تحریک انصاف کے رہنما فواد چوہدری نے اے‌آر وائی نیوز کے پروگرام باخبر سویرا میں گفتگو کرتے ہوئے کہا کہ ہم عام انتخابات کی طرف جانا چاہتےہیں،لائحہ عمل واضح ہے، 60 فیصد کے قریب ملک اب الیکشن کی طرف جائے گا۔

فواد چوہدری کا کہنا تھا کہ بہترہوگا باقی ملک بھی اب عام انتخابات کی طرف بڑھے، میرا خیال ہے 10 سے 15 دنوں میں وفاقی حکومت سے بھی جان چھوٹ جائے گی۔

تحریک انصاف کے رہنما نے کہا کہ اپوزیشن لیڈر،پارلیمانی لیڈراورچیئرمین پی اے سی کاعہدہ پی ٹی آئی کو دیں، قانون کہتا ہے جس کے پاس نمبرز سب سے زیادہ ہوں اپوزیشن لیڈر اس کا ہوگا، حکومت کو یہ تینوں عہدے پی ٹی آئی کو دینے پڑیں گے۔

ان کا کہنا تھا کہ پی ڈی ایم حکومت نے احمقانہ فیصلےکیے،یہ ہماری گیم میں آگئے ہیں، صدر مملکت اب بھی اعتماد کے ووٹ کا کہہ سکتے ہیں ، یہ قومی اسمبلی میں اپنے نمبرز پورے نہیں کرپائیں گے۔

فواد چوہدری نے کہا کہ ہم تو پہلے ہی کہہ رہے تھے تمام استعفے قبول کریں، تقریباً 800 میں سے 500 نشست پرالیکشن ہونے جارہے ہیں، جن بوتل سے باہر آگیا ہے اب یہ سنبھال نہیں پائیں گے۔

رہنما پی ٹی آئی کا کہنا تھا کہ مستحکم حکومت ہی پاکستان میں مسائل کاہےجوالیکشن سےآئےگی، موجودہ حکومت غلط فیصلوں کا نتیجہ ہے، پاکستان کے مسئلے کا حل عام انتخابات اور منتخب حکومت ہے۔

Comments

یہ بھی پڑھیں