اسلام آباد: وفاقی وزیر برائے اطلاعات و نشریات فواد چوہدری کا کہنا ہے کہ ریڈیو پاکستان کو مکمل ڈیجیٹلائز کر رہے ہیں، صحافیوں کو وہ سہولت دینے جا رہے ہیں جس کی مثال نہیں ملتی، ہم نے صحافیوں کو کامیاب جوان پروگرام کا حصہ بنایا ہے۔
تفصیلات کے مطابق وفاقی وزیر برائے اطلاعات و نشریات فواد چوہدری نے قومی اسمبلی کے اجلاس میں کہا کہ ہم نے 20 سال دہشت گردی کے خلاف جنگ لڑی، گزشتہ دنوں انفو لیب بھی پکڑی گئی۔ 845 جعلی ویب سائٹس بنائی گئیں جن سے جھوٹی خبریں پھیلائی گئیں۔
فواد چوہدری کا کہنا تھا کہ انفو لیب کے ذریعے پاکستان مخالف اقدامات کیے گئے، یہ اصل لڑائی ہے کہ ہم اپنا بیانیہ کیسے پیش کرتے ہیں۔
انہوں نے کہا کہ ہم اداروں کو مستحکم کر رہے ہیں، ماضی کی حکومتوں نے اے پی پی،پی ٹی وی، ریلوے اور اسٹیل مل کو بٹھا دیا، آج عمران خان کو ہر عمارت کی بنیاد پھر سے رکھنا پڑ رہی ہے۔ ان اداروں کی بنیادوں کو مضبوط کرنے کی ضرورت ہے۔
فواد چوہدری کا کہنا تھا کہ اگست کے پہلے ہفتےمیں پی ٹی وی مکمل ایچ ڈی ہوجائے گا، اے پی پی ورلڈ کلاس نیوز ایجنسی اگست میں اپنا کام شروع کرے گی، ریڈیو پاکستان کو مکمل ڈیجیٹلائز کر رہے ہیں۔ کہا جاتا ہے کہ صحافیوں کی جانوں کو خطرہ ہے، ملکی تاریخ میں صحافیوں پر سب سے زیادہ حملے پیپلز پارٹی کے دور میں ہوئے، مسلم لیگ کے دور میں 18 حملے ہوئے جن میں 14 صحافی جان کی بازی ہار گئے۔
انہوں نے مزید کہا کہ صحافیوں کو وہ سہولت دینے جا رہے ہیں جس کی مثال نہیں ملتی، ہم نے صحافیوں کو کامیاب جوان پروگرام کا حصہ بنایا ہے۔
