اسلام آباد : وفاقی وزیر سائنس اینڈ ٹیکنالوجی فواد چوہدری نے واٹس ایپ کاپرائیویسی پالیسی میں تبدیلی مؤخر کرنے کا فیصلہ درست قرار دیتے ہوئے کہا اہم ہے کہ ڈیٹا کی سیکیورٹی جیسے فیصلے صارفین کے علم میں ہوں۔
تفصیلات کے مطابق وفاقی وزیر سائنس اینڈ ٹیکنالوجی فواد چوہدری نے سماجی رابطے کی ویب سائٹ ٹوئٹر پر واٹس ایپ کی نئی پالیسی کے حوالے سے اپنے بیان میں کہا واٹس ایپ کاپرائیویسی پالیسی میں تبدیلی مؤخرکرنےکا فیصلہ درست قدم ہے، فیس بک جیسی کمپنیاں بہت بڑی آبادی کو متاثر کرتی ہیں ، اہم ہے کہ ڈیٹا کی سیکیورٹی جیسے فیصلے صارفین کے علم میں ہوں، ڈیٹا اور پرائیویسی ہر صورت میں یقینی بنائی جائے۔
Whatsapp decision to delay the change of privacy policy is certainly a positive step,companies like facebook effect too many people and it’s important that in critical decision making involve wider section of consumers and Data protection must be ensured at all times #WhatsApp
— Ch Fawad Hussain (@fawadchaudhry) January 16, 2021
یاد رہے واٹس ایپ نے اپنی متنازعہ پرائیویسی پالیسی کے متعلق ایک اہم بیان جاری کرتے ہوئے کہا تھا کہ ڈیٹاشیئرنگ پالیسی میں تبدیلی تین ماہ کے لیے مؤخر کردی گئی ہے۔
واٹس ایپ نے اپنی ٹویٹ میں کہا تھا کہ ہم سے رابطہ کرنے والے ہر فرد کا شکریہ۔ ہم واٹس ایپ صارفین سے براہِ راست رابطہ کرکے ’غلط فہمی‘ کا ازالہ کریں گے۔ آٹھ فروری کو کسی کے بھی اکاؤنٹ ختم یا معطل نہیں کئے جائیں گے، مئی میں ہم اپنے کاروباری منصوبے کو دوبارہ پیش کریں گے۔
ایک اور ٹوئٹ میں کہا گیا کہ ہم چاہتے ہیں کہ صارفین کو ہماری شرائط جاننے اور جائزہ لینے کا مناسب وقت مل جائے، ہم یقین دلاتے ہیں کہ ہم کوئی اکاؤنٹ ڈیلیٹ نہیں کریں گے۔
واضح رہے کہ واٹس ایپ کو حالیہ دنوں صارفین کی جانب سے واٹس ایپ کو پرائیویسی پالیسی کے باعث شدید تنقید کا نشانہ بنایا جارہا تھا، جس کے تحت کہا گیا تھا کہ جو صارف اس پالیسی سے اتفاق نہیں کرے گا وہ آٹھ فروری کے بعد اکاؤنٹ سے محروم ہوجائے گا یعنی اُس کا نمبر بلاک کردیا جائے گا۔
